బాలుని పొట్టలోకి దూసుకుపోయిన ఈటె

పొట్టలో ఈటెతో రాజు

కటక్‌, న్యూస్‌టుడే: బొలంగీర్‌ జిల్లా బెల్‌పడా సమితి ఐలాబట్టా గ్రామంలో 13 ఏళ్ల బాలుని కడుపులోకి ఈటె దూసుకుపోయింది. ఆయనకు బీమబోయి వైద్యకళాశాల ఆసుపత్రిలో చికిత్స అందిస్తున్నారు. ఐలాబట్టా గ్రామానికి చెందిన రాజు (13) చెరువులో చేపలు వేటాడేందుకు సొంతంగా 6 అడుగుల పొడవైన ఈటె తయారు చేశాడు. దానిని పట్టుకొని ఆదివారం ఇంటి నుంచి గ్రామ సమీపంలో ఉన్న చెరువుకు బయలు దేరాడు. పొలం గట్టుపై నడిచి వెళుతూ కాలు జారి పడిపోయాడు. దీంతో ఆయన చేతిలో ఉన్న ఈటె కడుపులో గుచ్చుకుంది. గమనించిన గ్రామస్థులు ఆయనను తొలుత బొలంగీర్‌ జిల్లా ప్రధాన ఆరోగ్యకేంద్రానికి అంబులెన్స్‌లో తరలించారు. అక్కడి నుంచి బీమబోయి వైద్యకళాశాల ఆసుపత్రికి తీసుకెళ్లారు. బాలుని పొట్టలో గుచ్చుకుని పరికరాన్ని తీసేందుకు వైద్యులు శస్త్రచికిత్స చేశారు.