21 మంది విద్యార్థులకు అస్వస్థత

ఆసుపత్రిలో కూర్చున్న చిన్నారులు

కటక్‌, న్యూస్‌టుడే: నువాపడ జిల్లా కోమన సమితి ప్రాంతంలోని సేలబట్‌ ఆవాసిక ప్రాథమిక పాఠశాలలో చదువుతున్న 21 మంది విద్యార్థులు అస్వస్థతకు గురయ్యారు. వారిని కోమన ప్రభుత్వ ఆసుపత్రికి తరలించారు. చికిత్స చేసిన వైద్యులు విద్యార్థులకు ప్రాణాపాయం లేదని తెలిపారు. పాఠశాలలో 44 మంది విద్యార్థులు మంగళవారం రాత్రి అన్నం, గుడ్డు తిన్నారని కొంతసేపటికి ఒకరు తరువాత ఒకరు వాంతులు చేసుకున్నారని వార్డెన్‌ వెల్లడించారు. బుధవారం విద్యార్థులు కోలుకున్నట్లు చెప్పారు. సమితి విద్యాధికారి హేమనంద్‌ మాట్లాడుతూ.. 44 మంది విద్యార్థులు భోజనం చేయగా 21 మందికి ఇలా జరిగిందని ఆహారం విషపూరితం అయిందా? ఇతర కారణాలు ఏమైనా ఉన్నాయా అనే అంశంపై దర్యాప్తు చేస్తామన్నారు.