కాలేయ వ్యాధితో బాధపడుతున్న నటుడు పింటూ నంద

కటక్‌, న్యూస్‌టుడే: రాష్ట్ర ప్రజలను గత 25 ఏళ్లుగా తన నటనతో రంజింపచేస్తున్న హాస్య నటుడు పింటూ నంద అస్వస్థతకు గురయ్యారు. కాలేయ సంబంధిత వ్యాధితో భువనేశ్వర్‌లోని ప్రైవేటు ఆసుపత్రిలో చికిత్స పొందుతున్నారు. ఆరోగ్య పరిస్థితి విషమంగా ఉందని, కాలేయ మార్పిడి చేయాల్సి ఉంటుందని వైద్యులు వెల్లడించారు. దీంతో కళాకారుల సంఘం ఆర్థికసాయానికి ముందుకొచ్చింది. సంఘం ప్రతినిధి, కథానాయకుడు శ్రీతందాస్‌ బుధవారం మీడియాతో మాట్లాడుతూ.. ఎంతోమందిని తన నటనతో అలరించిన పింటూ నేడు సహాయం కోసం ఎదురు చూస్తున్నట్లు చెప్పారు. ఆయన శస్త్రచికిత్సకు రూ.40 నుంచి 50 లక్షల వరకు ఖర్చవుతుందని, సినీ రంగంలో ఉన్నవారు, అభిమానులు ఆయనకు సాయం అందించాలని కోరారు.