సృష్టి, స్థితి, లయలకు నిరాకార పరబ్రహ్మమే మూలాధారం

అలేఖ యోగులతో కలసి ప్రార్ధనలు చేస్తున్న ధర్మేంద్ర

భువనేశ్వర్‌, న్యూస్‌టుడే: నిరాకార పరబ్రహ్మం సృష్టి, స్థితి, లయలకు మూలాధారమని కేంద్ర విద్యాశాఖ మంత్రి ధర్మేంద్ర ప్రధాన్‌ చెప్పారు. ఢెంకనాల్‌ జిల్లా జొరొందా అలేఖ శూన్య బ్రహ్మ క్షేత్రంలో మహిమా యోగుల వారం రోజల మాఘమేళా, విశ్వశాంతి ప్రార్థనలు కొనసాగుతున్నాయి. ఆదివారం రాత్రి ఇక్కడే విడిది చేసిన ధర్మేంద్ర సోమవారం ఉదయం యోగులతో కలసి నిరాకార పరబ్రహ్మ ప్రార్ధనలు చేశారు. వారి ఆశీస్సులు పొందారు. ఈ సందర్భంగా ఆయన మాట్లాడుతూ... సర్వసంఘ పరిత్యాగులైన అలేఖ సిద్ధ యోగులు దేశవ్యాప్తంగా సంచరిస్తూ మతసామరస్యం, సద్భావన పెంపొందిస్తూ ప్రజల్లో ఆధ్యాత్మిక భావనలు చిగురింపజేస్తున్నారన్నారు. ఢెంకనాల్‌లోని ఈ చారిత్రక, ధార్మిక క్షేత్రం పవిత్రతకు నిలువుటద్దమని పేర్కొన్నారు. మాఘమేళా పూర్ణాహుతిలో పాల్గొన్న ధర్మేంద్ర యోగులతో కలసి అలేఖ కీర్తనలు ఆలపించారు.

ఆశీస్సులందుకుంటున్న కేంద్ర మంత్రి