సరకు రవాణాలో సరికొత్త రికార్డు

రెండోసారి 200 మిలియన్‌ టన్నుల లక్ష్యాన్ని పూర్తి చేసిన తూర్పు కోస్తారైల్వే

గూడ్స్‌ రైలులో లోడు చేస్తున్న బొగ్గు

రాయగడ పట్టణం, న్యూస్‌టుడే: సరకు రవాణాలో తూర్పు కోస్తా రైల్వే మరో రికార్డుని సొంతం చేసుకుంది. వరుసగా రెండో ఏడాదిలో 200 మిలియన్‌ టన్నులకు పైగా సరకును లోడింగ్‌ చేసిన ఘనత దక్కించుకుంది. రైల్వే జోన్‌ వర్గాలు మీడియాకు వెల్లడించిన వివరాల ప్రకారం... ఈ ఆర్థిక సంవత్సరం (2022-23)లో ఇప్పటివరకు 232.32 మి.టన్నుల సరకుని తూర్పుకోస్తా జోన్‌ రవాణా చేసింది. ఈ ఆర్థిక సంవత్సరం ముగిసేందుకు ఇంకా కొద్ది రోజులు సమయమున్న నేపథ్యంలో రవాణా 240మి.టన్నులకు చేరుకోవచ్చని రైల్వే వర్గాలు భావిస్తున్నాయి. 2021-22లో 223.64 మి.టన్నులను లోడు చేసిన జోన్‌ ఈ సారి మరింత సరకుని రవాణా చేయడం గమనార్హం. భారత రైల్వేలో వరుసగా 220, 230 మి.టన్నులకు పైగా సరకు రవాణా చేసిన జోన్‌గా తూర్పుకోస్తా నిలిచింది.

 పెరిగిన ఆదాయం..

సరకు రవాణా ద్వారా 2021-22లో రూ.22,184.85 కోట్లు సంపాదించిన జోన్‌కు ఈ ఆర్థిక సంవత్సరంలో ఇప్పటివరకు రూ.23,872.69 కోట్లు ఆదాయం సమకూరింది. గతేడాదితో పోలిస్తే ఈ సారి ఆదాయం 7.6 శాతం పెరిగినట్లు జోన్‌ వెల్లడించింది. జోన్‌ పరిధిలోని మూడు డివిజన్లకు చెందిన రైల్వే సిబ్బంది అంకితభావంతో విధులు నిర్వహించడంతో పాటు రైల్వే జీఎం మనోజ్‌ శర్మ సహకారంతో ఇదంతా సాధ్యపడినట్లు అధికారులు పేర్కొన్నాయి. ఈ రికార్డుని సొంతం చేసుకోవడంలో ఓడ రేవులు, ఉక్కు అల్యూమినా, సిమెంట్‌ తదితర పరిశ్రమలతో పెట్రోలియం సంస్థలు, భారత ఆహార సంస్థల పాత్ర ఎంతో ఉందని రైల్వే వర్గాలు స్పష్టం చేశాయి.