యజమానిని కాపాడిన పెంపుడు శునకం

పాముకి అడ్డంగా నిలిచి..

మల్కాన్‌గిరి, న్యూస్‌టుడే: కుక్కకి ఉన్న విశ్వాసం మనిషికి ఉండదనే మాటను ఓ పెంపుడు శునకం నిజం చేసింది. యజమానిని వాళ్ల కుటుంబ సభ్యులను పాము బారి నుంచి కాపాడింది. ఈ ఘటన మల్కాన్‌గిరి పట్టణంలో చోటు చేసుకుంది. వివరాల్లోకి వెళ్తే ఆదివారం ఉదయం మల్కాన్‌గిరి పట్టణం, సరస్వతి శిశు విద్యామందిర్‌ సమీపంలో ఉంటున్న శివ ప్రసాద్‌ మాఝి అనే వ్యక్తి ఇంట్లో ఓ పాము ప్రవేశించింది. ఇంతలో ఆయన పెంచుకుంటున్న కుక్క పాముని చూసి దానిని ఇంటి లోపలికి వెళ్లనివ్వకుండా అడ్డుకుని, గాయాలు చేసింది. కుక్క అరుపులు విని యజమాని, కుటుంబ సభ్యులు బయటికి వచ్చి కుక్క దగ్గర పాము ఉండడం గమనించారు. వెంటనే స్నేక్‌ హెల్ప్‌ లైన్‌కు సమాచారం అందించారు. వారు పాముని పట్టుకున్నారు.