ఏప్రిల్‌ 4 నుంచి ఆసియా టెన్నిస్‌ పోటీలు

టెన్నిస్‌ కోర్ట్‌ ప్రారంభిస్తున్న నవీన్‌. పక్కన మంత్రి తుషారకాంతి, అధికారులు

భువనేశ్వర్‌, న్యూస్‌టుడే: క్రీడల రాజధానిగా ఒడిశా రూపాంతరం చెందిందని, క్రీడా మైదానాలకు నూతన హంగులు కల్పిస్తున్నందున అంతర్జాతీయ క్రీడలకు రాష్ట్రం వేదికైందని ముఖ్యమంత్రి నవీన్‌ పట్నాయక్‌ చెప్పారు. భువనేశ్వర్‌ కళింగ స్టేడియంలో కొత్తగా నిర్మాణమైన అత్యాధునిక టెన్నిస్‌ కోర్టును బుధవారం రాత్రి ఆయన ప్రారంభించారు. ఈ సందర్భంగా ఆయన మాట్లాడుతూ.. అన్ని క్రీడలను ప్రోత్సహించడం తమ ప్రభుత్వ ధ్యేయమని, ఈ దిశగా శిక్షణకు ప్రాధాన్యమిస్తున్నామన్నారు. కార్యక్రమంలో క్రీడలు, యువజన సర్వీసులశాఖ మంత్రి తుషారకాంతి బెహరా, ప్రభుత్వ ప్రధాన కార్యదర్శి ప్రదీప్‌ కుమార్‌ జెనా, క్రీడలశాఖ ప్రిన్సిపల్‌ కార్యదర్శి ఆర్‌.వినీల్‌ కృష్ణ, రాష్ట్ర టెన్నిస్‌ సంఘం అధ్యక్షుడు అసిత్‌ త్రిపాఠి, 5-టీ కార్యదర్శి వి.కార్తికేయ పాండ్యన్‌, అధికారులు, క్రీడాకారులు పాల్గొన్నారు. ఈ టెన్నిస్‌ కోర్టులో ఏప్రిల్‌ 4 నుంచి 14 వరకు ఆసియా దేశాల అండర్‌-14 పోటీలు జరగనున్నాయి. 15 దేశాల క్రీడాకారులు పాల్గొననుండగా నవీన్‌ ‘లోగో’, జెర్సీలను ఆవిష్కరించారు. టెన్నిస్‌లో శిక్షణ పొందిన కొంతమంది క్రీడాకారులకు ప్రోత్సాహకంగా చెక్కులు అందజేశారు.