గంజాం జిల్లా తీరాన అరుదైన ‘గ్రీన్‌ సీ తాబేలు’

బ్రహ్మపుర నగరం, న్యూస్‌టుడే: సముద్ర తాబేళ్లలో అరుదైన ‘గ్రీన్‌ సీ టర్టల్‌’ గంజాం జిల్లా రుషికుల్యా ముఖద్వారం తీరాన సందడి చేసింది. గంజాం సమితిలోని పోడమ్మపేట గ్రామం తీరానికి ఆదివారం అర్ధరాత్రి ఒంటిగంట సమయంలో సాగర జలాల నుంచి ఇది వచ్చిందని బ్రహ్మపుర అటవీ అధికారి (డీఎఫ్‌ఓ) సన్నీ ఖొఖర్‌ గురువారం సాయంత్రం ‘న్యూస్‌టుడే’కు చెప్పారు. సుమారు రెండు గంటలు అది తీరాన తిరిగి, మళ్లీ సముద్ర జలాల్లోకి వెళ్లిపోయిందని ఆయన పేర్కొన్నారు. ఈ సాగర తాబేలు పొడవు 1.45 మీటర్లు, వెడల్పు 88 సెంటీమీటర్లు ఉంది. బరువు సుమారు 140 కిలోల వరకు ఉంటుందని అటవీ అధికారులు అంచనా వేస్తున్నారు. జిల్లా తీరాన ఈ జాతి తాబేలు తొలిసారి కనిపించినట్లు అటవీ అధికారులు తెలిపారు. గంజాం జిల్లా తీరానికి దీర్ఘకాలంగా సముద్ర తాబేళ్లు ఆలివ్‌ రిడ్లీలు ఏటా భారీ సంఖ్యలో సామూహికంగా గుడ్లు పెట్టేందుకు వస్తున్న సంగతి తెలిసిందే.