మరణంలోనూ వీడని బంధం

 భర్త మృతి చెందిన 24 గంటల్లోపు భార్య మరణం

నరసింహం, లలిత (పాత చిత్రం)

రాయగడ, న్యూస్‌టుడే: మూడు ముళ్లు వేసి, ఏడడుగులు నడచి జీవితాంతం కలసి ఉంటానని పెళ్లినాడు చేసిన ప్రమాణాలు పాటిస్తూ కలసి జీవించిన ఆ దంపతులు మరణంలోనూ ఒకటిగా వెళ్లిపోయారు. పట్టణంలో సంతోషిమాత ఆలయ ప్రధాన అర్చకులుగా చివరి క్షణం వరకూ పనిచేసిన శ్రీపాద నరసింహం (69) గుండె పోటుతో మంగళవారం రాత్రి 9.30 గంటలకు రాణిగుడ ఫార్మ్‌లోని స్వగృహంలో మృతి చెందారు. బుధవారం సాయంత్రం సిరిగుడ స్వర్గధామంలో కుటుంబ సభ్యులు అంత్యక్రియలు నిర్వహించారు. భర్త మరణంతో కుంగిపోయిన ఆయన భార్య లలిత (59) ఆయన మరణించిన 24 గంటలు కాక ముందే బుధవారం రాత్రి 9 గంటలకు తుది శ్వాస విడిచారు. ఇద్దరి మరణం ఒకే సారి సంభవించడంతో కుటుంబంలో తీవ్ర విషాదం నెలకొంది. గురువారం ఆమె దహన సంస్కారాలు పూర్తి చేశారు. వీరికి ఇద్దరు కొడుకులు ఉన్నారు. ఉత్కళ ఆంధ్రా బ్రాహ్మణ సేవా సమాజం సభ్యులు, డైలీ మార్కెట్‌ వ్యాపారులు, సంతోషిమాత ఆలయ ట్రస్ట్‌ సభ్యులు సంతాపం తెలియజేశారు.