కషాయాల వినియోగంతో అధిక దిగుబడులు

బలిజిపేట: పంటల్లో తక్కువ పెట్టుబడితో అధిక దిగుబడులు సాధించేందుకు రైతులు అందుబాటులో ఉన్న కషాయాలను తయారు చేసి వినియోగించాలని మండల వ్యవసాయాధికారి ఎం.శ్రావణ్‌కుమార్‌ తెలిపారు. మిర్తివలస గ్రామ రైతు భరోసా కేంద్రంలో సామూహిక కషాయాలు, ద్రావణాల తయారీపై ఆయన రైతులకు అవగాహన కల్పించారు. ప్రకృతి వ్యవసాయంలో జిల్లేడు ద్రావణం, ఇంగువ ద్రావణం, అగ్ని అస్త్రం తదితర రసాయనాలను తయారుచేసి పొలంలో చల్లితే తెగుళ్లు, పురుగులను నివారించవచ్చన్నారు. ఈ విధానంపై రైతులకు ప్రయోగాత్మకంగా అవగాహన కల్పించారు. కార్యక్రమంలో వ్యవసాయ శాఖ సహాయకులు, రైతులు పాల్గొన్నారు.