కుమరాంలో మరో చోరీ

ఇంట్లో  పరిశీలిస్తున్న డీఎస్పీ శ్రీనివాసరావు

జామి, న్యూస్‌టుడే: మండలంలోని కుమరాం పంచాయతీ కల్యాణ నగర్‌లో శుక్రవారం చోరీ ఘటన మరవక ముందే మరొకటి వెలుగు చూసింది. పోలీసులు తెలిపిన వివరాల ప్రకారం.. ఇదే గ్రామానికి చెందిన వర్రి అప్పాజీ స్వామి అయ్యప్ప దీక్షతో శబరిమల వెళ్లి శనివారం మధ్యాహ్నం తిరిగి వచ్చారు. ఇంటి తలుపులు తెరిచి ఉండటంతో లోపలికి వెళ్లి చూడగా బీరువా తాళాలు తీసి ఉండటం, దుస్తులు చిందరవందరగా పడి ఉండడంతో దొంగలు పడ్డారని పోలీసు స్టేషన్‌కు సమాచారమిచ్చారు. ఎస్‌ఐ వీరబాబు వెళ్లి వివరాలు సేకరించారు. క్లూటీం పరిశీలనలో వెండి వస్తువులు దొరికాయి. మొత్తం ఆరు తులాల బంగారం, రూ.50 వేల నగదు అపహరణకు గురైనట్లు బాధితుడు అప్పాజీ ఫిర్యాదు చేశారు.

తేలిన లెక్క: ఇదే గ్రామంలో పిన్నింటి ప్రసాదరావు ఇంట్లో చోరీకి గురైంది 22 తులాల బంగారం, 60 తులాల వెండిగా లెక్క తేలింది. ఇంటికి చేరుకున్న బాధితుడు ఈ మేరకు పోలీసులకు ఫిర్యాదు చేశారు.

డీఎస్పీ పరిశీలన.. కుమరాంలో చోరీలు జరిగిన రెండు ఇళ్లను విజయనగరం డీఎస్పీ శ్రీనివాసరావు శనివారం రాత్రి పరిశీలించారు. ప్రసాదరావు ఇంట్లో చోరీ జరిగిన తీరును గమనించారు. మరో బాధితుడు అప్పాజీ ఇంటిని సందర్శించారు. త్వరలో నిందితులను పట్టుకుంటామని, దర్యాప్తులో పోలీసులకు సహకరించాలని ఆయన కోరారు.