వనంగుడిలో యువకుడి హల్‌చల్‌

గాయాలు చూపిస్తున్న ధనరాజ్‌

నేరవార్తావిభాగం, కంటోన్మెంట్‌, న్యూస్‌టుడే: నగరంలోని పైడితల్లి వనంగుడిలో సోమవారం తెల్లవారుజామున గుర్తు తెలియని వ్యక్తి హల్‌చల్‌ చేశాడు. ఒకటో పట్టణ సీఐ వెంకటరావు వివరాల మేరకు.. ఆలయ ప్రవేశ ద్వారం వద్దగల పిట్టగోడ దూకి ఓ యువకుడు లోపలికి ప్రవేశించాడు. అప్రమత్తమైన కాపలాదారుడు ధనరాజ్‌ కేకలు వేయడంతో ఆయన తలపై, చేతి మీద కర్రతో కొట్టాడు. వెంటనే మరో కాపలాదారుడు అప్రమత్తమై యువకుడ్ని పట్టుకొని పోలీసులకు సమాచారమిచ్చారు. అయితే సదరు వ్యక్తికి మతిస్థిమితం లేదని, ఆలయ అధికారులు, ఉద్యోగుల నుంచి ఫిర్యాదు అందకపోవడంతో విడిచిపెట్టామని సీఐ తెలిపారు. గాయపడిన వ్యక్తిని సర్వజన ఆసుపత్రికి తరలించారు.