లారీ ఢీకొని 34 గొర్రెల మృత్యువాత

కొత్తవలస, న్యూస్‌టుడే: లారీ డ్రైవరు నిర్లక్ష్యం.. 34 జీవాల మృతికి కారణమైంది. పోలీసుల వివరాల మేరకు.. లక్కవరపుకోట మండలం కిత్తన్నపేటకు చెందిన దుక్క గంగునాయుడు, యలమల సూరిబాబు, బర్నికాన అంజి, గొలగాని భూలోక సోమవారం వేకువజామున 300 గొర్రెలను కొత్తవలస నుంచి స్వగ్రామానికి తోలుకెళ్తున్నారు. అడ్డువానిపాలేనికి సమీపంలో మందపై నుంచి లారీ దూసుకెళ్లింది. దీంతో 34 గొర్రెలు  అక్కడికక్కడే మృత్యువాత పడ్డాయి. మరో 20 తీవ్రంగా గాయపడ్డాయి. లారీ డ్రైవరు పరారయ్యాడు. నిర్లక్ష్యం, అతివేగం కారణంగా ప్రమాదం చోటుచేసుకుందని పోలీసులు భావిస్తున్నారు. ఈ హఠాత్పరిణామానికి కాపరి భూలోక కుప్పకూలారు. మిగిలిన వారు గమనించి అతన్ని 108లో ఎస్‌.కోట ప్రాంతీయాసుపత్రికి తరలించారు. కొత్తవలస ప్రభుత్వ పశువుల ఆసుపత్రి సహాయ సంచాలకుడు గంగాధర్‌ గాయపడిన వాటికి వైద్యం చేశారు. సుమారు రూ.3 లక్షలకు పైగా నష్టం జరిగినట్లు బాధితులు వాపోతున్నారు. వారి ఫిర్యాదు మేరకు కేసు నమోదు చేసినట్లు ఎస్సై వీరజనార్దన్‌ తెలిపారు. మాజీ ఎమ్మెల్యే కోళ్ల లలితకుమారి సంఘటనా స్థలానికి చేరుకుని బాధితుల్ని పరామర్శించారు. అధికారులు స్పందించి బాధితులకు పరిహారం అందించాలని కోరారు. ఆమె వెంట ఎల్‌.కోట మాజీ ఎంపీపీ రమణమూర్తి, మాజీ జడ్పీటీసీ సభ్యుడు కె.ఈశ్వరరావు తదితరులున్నారు.

కాపరుల ఆవేదన