దివ్యాంగులకు కృత్రిమ అవయవాల పంపిణీ

కృత్రిమ చేయి పొందిన లబ్ధిదారునితో కరచాలనం చేస్తున్న కాకినాడ సీ పోర్ట్స్‌ సీవోవో మురళీధర్‌

కొత్తవలస, న్యూస్‌టుడే: మంగళపాలెం శ్రీగురుదేవ ఛారిటబుల్‌ ట్రస్ట్‌ ఆధ్వర్యంలో కాకినాడ సీ పోర్ట్స్‌ సీఎస్‌ఆర్‌ (సామాజిక బాధ్యత) కింద సమకూర్చిన సుమారు రూ.25 లక్షల ఆర్థిక సహాయంతో 200 మంది దివ్యాంగులకు కృత్రిమ అవయవాలు, ఉపకరణాలు శనివారం అందజేశారు. ట్రస్ట్‌ ఛైర్మన్‌ రాపర్తి జగదీశ్‌కుమార్‌ అధ్యక్షతన ఏర్పాటు చేసిన కార్యక్రమానికి సీ పోర్ట్స్‌ సీవోవో మురళీధర్‌ ముఖ్య అతిథిగా హాజరై లబ్ధిదారులకు వాటిని అందజేశారు. వినికిడి యంత్రాలు, చక్రాల కుర్చీలు, బ్లెయిండ్‌ స్టిక్స్‌ వంటివి ఉన్నాయి. గత పాతికేళ్లలో 1.78 లక్షల మంది దివ్యాంగులకు కృత్రిమ అవయవాలు, ఉపకరణాలను దాతల సహకారంతో అందించామని ట్రస్ట్‌ ఛైర్మన్‌ ప్రకటించారు. వైస్‌ ఛైర్మన్‌ డా.ఫణీంద్ర, రమణమూర్తి పాల్గొన్నారు.