బాలిక అదృశ్యం: సిబ్బందికి నోటీసులు

కేజీబీవీ సిబ్బందిని విచారిస్తున్న ఎంఈవో

గరుగుబిల్లి గ్రామీణం: బాలిక అదృశ్యం కేసులో రావివలస కేజీబీవీ ప్రత్యేకాధికారిణి ఛాయాదేవికి డీఈవో రమణ షోకాజ్‌ నోటీసులు జారీ చేశారు. విధుల్లో నిర్లక్ష్యంగా ఉన్న కాపలాదారుడ్ని సస్పెండ్‌ చేశారు. ఈ విద్యాలయంలో పదో తరగతి చదువుతున్న ఓ బాలిక ఇటీవల బయటకు వెళ్లి తిరిగిరాకపోవడంతో పోలీసులు కేసు నమోదు చేశారు. దీనిపై డీఈవో విచారణ నిర్వహించి చర్యలు చేపట్టారు. ఉద్యోగులు, విద్యార్థుల నుంచి ఎంఈవో నాగభూషణరావు శనివారం వివరాలు సేకరించారు. మరోవైపు ఎస్సై రాజేశ్‌ దర్యాప్తు చేపట్టారు. చరవాణి ఆధారంగా బాలిక విశాఖలో ఓ వ్యక్తి వద్ద ఉన్నట్లు గుర్తించి, తల్లిదండ్రులకు అప్పగించారు. ఉన్నతాధికారుల ఆదేశాల మేరకు నిందితుడిపై చర్యలు తీసుకుంటామన్నారు.