పది విద్యార్థులకు ఇబ్బందులు రానివ్వొద్దు

అధికారులకు సూచనలు చేస్తున్న కలెక్టర్‌ నిశాంత్‌కుమార్‌, చిత్రంలో డీఈవో రమణ

పార్వతీపురం, న్యూస్‌టుడే: జిల్లాలో పదో తరగతి పరీక్షలకు ఏర్పాట్లు పూర్తి చేసినట్లు కలెక్టర్‌ నిశాంత్‌కుమార్‌ తెలిపారు. బుధవారం కలెక్టరేట్‌లో వివిధ శాఖల అధికారులతో ఆయన మాట్లాడారు. పరీక్షలకు 64 కేంద్రాలను సిద్ధం చేశామన్నారు. పరిశీలనకు సూపరింటెండెంట్లు, శాఖాధికారులతో పాటు ఇన్విజిలేషన్‌కు 650 మంది, 12 మంది రూట్‌ అధికారులు, మూడు ఫ్లయింగ్‌  స్క్వాడ్‌లను     నియమించామన్నారు. కేంద్రాలకు కి.మీ. పరిధిలో ఉన్న జిరాక్స్‌ కేంద్రాలను మూసివేయాలని ఆదేశించారు. వైద్యసేవలు అందించేందుకు వైద్య సిబ్బందిని, అవసరమైన మందులను అందుబాటులో ఉంచాలని కోరారు. విద్యార్థులకు ఇబ్బందులు లేకుండా బెంచీలు, టేబుళ్లను ఏర్పాటు చేయాలని, అవసరమైన రూట్లలో బస్సులు తిప్పాలన్నారు. సార్వత్రిక విద్యలో పది, ఇంటర్‌ పరీక్షలకు ఎనిమిది కేంద్రాలను ఏర్పాటు చేసినట్లు వివరించారు. డీఈవో ఎస్డీవీ రమణ, డీఎస్పీ సుభాష్‌, డీఎంహెచ్‌వో బి.జగన్నాథరావు, డిప్యూటీ డీఈవో బ్రహ్మాజీరావు, ఆర్టీసీ అధికారులు పాల్గొన్నారు.