చెరువు గట్లపై 200 అక్రమ నిర్మాణాలు

అధికారులకు సూచనలు చేస్తున్న ఆర్డీవో శేషశైలజ

బొబ్బిలి, న్యూస్‌టుడే: బొబ్బిలి పట్టణంలోని చెరువులు, గట్లు ఆక్రమించి ఇష్టారాజ్యంగా నిర్మాణాలు చేపట్టడంతో వామపక్షాల ఆందోళనల మేరకు ఆర్డీవో శేషశైలజ బుధవారం పరిశీలించారు. తారకరామ కాలనీలోని చీపురుబంద ఆక్రమించి రహదారి వేయడంతో దాన్ని తనిఖీ చేసి.. సర్వే నిర్వహించాలని అధికారులను ఆదేశించారు. కళాభారతిని ఆనుకున్న రాణిమల్లమ్మ చెరువు, రాతిపనివారి గట్లపై అక్రయ కట్టడాలు ఉన్నట్లు గుర్తించారు. అనంతరం అధికార పార్టీ కౌన్సిలర్లు చేసిన ఫిర్యాదు మేరకు అమ్మిగారి కోనేరును చూశారు. గతంలో చేపట్టిన నిర్మాణాలను విడిచిపెట్టి.. కొత్త భవనాలు, ఇతర పనులను వెంటనే ఆపేయాలని స్థానిక అధికారులకు సూచించారు. పట్టణంలోని చెరువు గట్లపై 200 వరకు అక్రమ నిర్మాణాలు ఉంటాయని, దీనిపై కలెక్టర్‌కు నివేదిస్తామని ఆర్డీవో ఈ సందర్భంగా విలేకర్లకు తెలిపారు.