సురక్షితంగా అప్పగించిన పోలీసులు

విద్యార్థిని కోసం నగర వీధుల్లో గాలిస్తున్న మద్దిపాడు ఎస్సై శ్రీరామ్‌, ఒంగోలు పోలీసు సిబ్బంది

ఒంగోలు నేరవిభాగం, న్యూస్‌టుడే: ఆమె ఇంజినీరింగ్‌ చదువుతోంది. ఓ యువకుడితో ప్రేమలో పడింది. అతన్నే పెళ్లి చేసుకుంటానని పట్టుబట్టినప్పటికీ తల్లిదండ్రులు అంగీకరించలేదు. అలాగైతే ఆత్మహత్యకు పాల్పడతానంటూ చెప్పి ఇంటి నుంచి బయటికి వచ్చేసింది. యువతి తల్లిదండ్రులు వెంటనే పోలీసులకు సమాచారం అందించారు. అంతే అద్దంకి నుంచి పోలీసు వేట మొదలైంది. విద్యార్థిని అద్దంకిలో ఆర్టీసీ బస్సు ఎక్కినట్టు గుర్తించి మద్దిపాడు పోలీసులను అప్రమత్తం చేశారు. ఆమెను గుర్తించి అదుపులోకి తీసుకోవాలని సూచించారు. యువతి వద్దనున్న చరవాణి సంకేతాల ఆధారంగా అప్పటికే బస్సు మద్దిపాడు దాటి ఒంగోలు దిశగా ప్రయాణిస్తున్నట్టు తెలుసుకుని ఒంగోలు పోలీసులనూ అప్రమత్తం చేశారు. ఒకటో పట్టణ సీఐ కె.వి.సుభాషిణి నగరంలోని పోలీసు సిబ్బందిని అప్రమత్తం చేసి గాలింపు చర్యలకు ఆదేశించారు. మద్దిపాడు ఎస్సై శ్రీరామ్‌ నగరానికి చేరుకుని జిల్లా పోలీసు కేంద్రంలోని సాంకేతిక బృందం సహాయం తీసుకున్నారు. రెండు గంటల పాటు శ్రమించి చివరికి ఆ యువతిని ఒంగోలు కొత్తపట్నం రోడ్డులో గుర్తించారు. ఆమె కుటుంబీకులకు అప్పగించడంతో కథ సుఖాంతమైంది.