30 శాతానికి పైగా ఫిట్‌మెంట్‌కు వినతి

డీఆర్వోకి వినతి పత్రం ఇస్తున్న ఆపస్‌ ప్రతినిధులు

ఒంగోలు నగరం, న్యూస్‌టుడే: ఉద్యోగుల పీఆర్సీ ఫిట్‌మెంట్‌ 30 శాతానికి పైగా ఇవ్వాలని కోరుతూ ఆంధ్రప్రదేశ్‌ ఉపాధ్యాయ సంఘం ఆధ్వర్యంలో డీఆర్వో శ్రీనివాసరావుకి సోమవారం వినతి పత్రం సమర్పించారు. ఫిట్‌మెంట్‌పై రాష్ట్ర ప్రభుత్వం పునఃసమీక్ష చేయాలని అందులో కోరారు. ఇంటి అద్దె భత్యాన్ని పాత పద్దతిలోనే 12,14.5, 20, 30 శాతం స్లాబ్‌లు కొనసాగించాలన్నారు. పెరిగిన ధరల ప్రకారం ప్రతి ఆరు నెలలకు ఒకసారి ఇవ్వాల్సిన కరవు భత్యాన్ని రెండున్నరేళ్లుగా ఇవ్వకుండా ఒకేసారి ఇస్తామనడం సహేతుకం కాదని పేర్కొన్నారు. డీఆర్వోను కలసిన వారిలో ఆపస్‌ సంఘం అధ్యక్షుడు కె.మల్లికార్జునరావు, నాయకులు దిలీప్‌చక్రవర్తి, ఫణీంద్రకుమార్‌, శేషారావు, చంద్రశేఖర్‌ తదితరులున్నారు.