ఉసురుతీసిన అప్పులు

 ఆత్మహత్యాయత్నం చేసిన రైతు మృతి

కొమ్మాలపాడు (సంతమాగులూరు), న్యూస్‌టుడే: అప్పుల బాధతో ఓ రైతు ఉసురు తీసుకున్న విషాదమిది. ఈనెల 18న ఆత్మహత్యాయత్నం చేసుకోగా శనివారం ఆయన మృతిచెందారు. సంతమాగులూరు స్టేషన్‌ ఎస్సై శివన్నారాయణ తెలిపిన వివరాల ప్రకారం.. కొమ్మాలపాడు గ్రామానికి చెందిన దుద్దేల రాగయ్య (40) గత మూడేళ్ల నుంచి మూడు ఎకరాలు కౌలుకు తీసుకుని వ్యవసాయం చేస్తున్నారు. ఈ ఏడాది రెండెకరాల్లో మిరప, ఒక ఎకరంలో పత్తి సాగు చేశారు. అకాల వర్షాలు, చీడపీడలతో పంట దెబ్బతింది. రూ.6 లక్షలకు పైగా అప్పుల పాలయ్యారు. దీంతో దిక్కుతోచని స్థితిలో రాగయ్య ఈ నెల 18న పొలం వెళ్లి పురుగు మందు తాగారు. సమీపంలో ఉన్న రైతులు గమనించి సమాచారాన్ని కుటుంబ సభ్యులకు చేరవేశారు. వారు వెంటనే నరసరావుపేట ప్రైవేటు ఆసుపత్రిలో చేర్పించి చికిత్స చేయించారు. పరిస్థితి విషమించడంతో అక్కడినుంచి గుంటూరు సర్వజన ఆసుపత్రికి తీసుకెళ్లగా శనివారం మృతి చెందారు. రాగయ్యకు భార్య రమణమ్మ, ఇద్దరు పిల్లలున్నారు. రమణమ్మ ఇచ్చిన ఫిర్యాదుపై కేసు నమోదు చేసి దర్యాప్తు చేస్తున్నట్లు ఎస్‌ఐ తెలిపారు.