కొత్త విధానం భారం.. పాతే ప్రయోజనం

 ప్రజాభిప్రాయ సేకరణలో వినియోగదారులు

సమావేశంలో పాల్గొన్న విద్యుత్తు శాఖ ఎస్‌ఈ సత్యనారాయణ, అధికారులు 

ఒంగోలు గ్రామీణం, న్యూస్‌టుడే: ‘నూతన ప్రతిపాదన టారిఫ్‌ అమలుతో తక్కువ యూనిట్లు వినియోగించుకునే వారికి ఎక్కువ; ఎక్కువ యూనిట్లు వినియోగించుకునే వారికి తక్కువ బిల్లులొచ్చేలా ఉంది. ఈ నేపథ్యంలో ప్రస్తుతం ఉన్న స్లాబులనే కొనసాగించాలి...’ అని కోరుతూ ఎక్కువ మంది వినియోగదారులు ఏపీ విద్యుత్‌ నియంత్రణ మండలి కమిషన్‌కు విన్నవించారు. ఏపీ విద్యుత్తు నియంత్రణ మండలి ఆధ్వర్యంలో 2022-23 ఆర్థిక సంవత్సరానికి సంబంధించిన ఆదాయ అవసరాలు, రిటైల్‌ ధరలపై ఒంగోలులోని విద్యుత్తు భవన్‌లో ప్రజాభిప్రాయ సేకరణ ఏర్పాటు చేశారు. తొలిరోజైన సోమవారం ఇద్దరు వినియోగదారులు తమ సూచనలను వీక్షణ సమావేశం ద్వారా కమిషన్‌ దృష్టికి తీసుకొచ్చారు. 0-30 యూనిట్లు ఒక స్లాబ్, ఆ పైన స్లాబుకు అదనంగా పెంచడం వలన చిన్న వినియోగదారులకు నష్టం వాటిల్లుతుందన్నారు. ఈ మేరకు పాత స్లాబునే యథావిధిగా కొనసాగించాలని కోరారు. కార్యక్రమంలో విద్యుత్తు శాఖ ఎస్‌ఈ కేవీజీ.సత్యనారాయణ, ఈఈలు శ్రీనివాసులు, కరీం, వేణుగోపాల్‌రెడ్డి, ఉషారాణి, ఎస్‌ఏవో సుబ్బారావు తదితరులు పాల్గొన్నారు.