మహనీయుల స్ఫూర్తితో జిల్లా అభివృద్ధికి కృషి

గౌరవ వందనం చేస్తున్న సంయుక్త కలెక్టర్‌ వెంకట మురళి, జేసీ కృష్ణవేణి, డీఆర్వో శ్రీనివాసులు

ఒంగోలు గ్రామీణం, న్యూస్‌టుడే: మహాత్మాగాంధీ, బీఆర్‌ అంబేడ్కర్‌, నేతాజీ తదితర దేశ నాయకుల త్యాగాల స్ఫూర్తితో జిల్లాను అభివృద్ధి వైపు దూసుకెళ్లేలా కృషి చేస్తున్నామని సంయుక్త కలెక్టర్‌ జె.వెంకట మురళి తెలిపారు. 73వ గణతంత్ర దినోత్సవం సందర్భంగా స్థానిక కలెక్టరేట్‌లో బుధవారం సంయుక్త కలెక్టర్‌ వెంకట మురళి జాతీయ జెండా ఆవిష్కరించారు. ఈ సందర్భంగా ఆయన మాట్లాడుతూ నేటి తరం పిల్లలు, యువతరానికి స్వేచ్ఛ, స్వాతంత్య్రం హక్కుల గురించి వివరించాల్సిన బాధ్యత ప్రతి ఒక్కరిపై ఉందన్నారు. శతాబ్దాలుగా విదేశీ పాలన కింద బానిసలుగా ఉన్న భారతదేశానికి స్వాతంత్య్రం సాధించి పెట్టిన మహనీయులను నేటి సమాజం గుర్తుంచుకోవాలని సూచించారు. కార్యక్రమంలో జేసీ కె.కృష్ణవేణి, డీఆర్వో పులి శ్రీనివాసులు, డీపీవో జీవీ.నారాయణరెడ్డి, డీఎస్వో సురేష్‌, జేడీఏ శ్రీనివాసరావు తదితరులు పాల్గొన్నారు.