పత్తి రైతుకు దళారుల బెడద

క్వింటాకు రూ.3 వేలు నష్టపోతున్న వైనం

త్రిపురాంతకం మండలంలో పత్తి పంట

ఖరీఫ్‌లో సాగు చేసిన వివిధ పంటలను చీడపీడలు చుట్టుముట్టడంతో దిగుబడులు గణనీయంగా తగ్గి రైతులు నష్టాలు చవి చూశారు. ఈ నేపథ్యంలో వేసవిలో పత్తి సాగు చేపట్టిన రైతులకు ధరలు ఆశాజనకంగా ఉన్నాయి. దళారులు రంగప్రవేశం చేసి తక్కువ ధరకు కొనుగోలు చేస్తుండటంతో రైతులు ఆవేదన వ్యక్తంచేస్తున్నారు. 

త్రిపురాంతకం గ్రామీణం, న్యూస్‌టుడే జిల్లాలో ఖరీఫ్‌లో 28,959 ఎకరాల్లో పత్తి సాగు చేశారు. రబీ సీజన్‌ నుంచి ఏప్రిల్‌ వరకు 10వేల ఎకరాల్లో ఉంది. సాగర్‌ ఆయకట్టు ప్రాంతాల్లోని బోరు బావులతో పాటు మెట్ట ప్రాంతంలోని బోర్ల కింద సైతం ఎక్కువగా వేశారు. ప్రధానంగా త్రిపురాంతకం మండలంలోని సోమేపల్లి, కంకణాపల్లి, బొంకూరివారిపాలెం, మేడపి, విశ్వనాథపురం, ఎండూరివారిపాలెం, గొల్లపల్లి, అన్నసముద్రం, నడిగడ్డ తదితర గ్రామాల్లో దాదాపు 2 వేల ఎకరాల్లో కనిపిస్తుంది. తాళ్లూరు, ముండ్లమూరు, దర్శి, కురిచేడు మండలాల్లో సైతం అధిక విస్తీర్ణంలో వేశారు. ప్రస్తుతం సాగు చేసిన పంటలో తొలి విడత పత్తి తీసి రైతులు విక్రయిస్తున్నారు. వచ్చే నెల నుంచి పూర్తి స్థాయిలో తీతలు ఆరంభమై చేతికి పంట రానుంది. పత్తి క్వింటా ధర బహిరంగ మార్కెట్లో రూ.14 వేలు పలుకుతోంది. దళారులు గ్రామాల్లో మాయమాటలు చెప్పి, రైతుల అవసరాలను ఆసరా చేసుకుంటూ క్వింటా రూ.11 వేలకు మించి కొనుగోలు చేయడం లేదు. వ్యాపారులు సిండికెట్‌గా మారి తగ్గిస్తుండటంతో నిల్వ సౌకర్యం లేని రైతులతో పాటు అప్పులు తెచ్చి పెట్టుబడులు పెట్టినవారు సైతం ఎంతోకొంతకు తెగనమ్ముకుంటున్నారు. ఈ నేపథ్యంలో రైతుకు క్వింటాకు గరిష్టంగా పదకొండు వేలకు మించి లభించడం లేదు. ఫలితంగా రూ.3 వేలు కోల్పోవాల్సి వస్తోంది. అదేమని అడిగితే సీసీఐ ప్రకటించిన ధర కంటే అధికంగానే ఇచ్చి కొంటున్నామని వ్యాపారులు చెబుతున్నారు.
* భారత్‌ నుంచి ఇతర దేశాలకు పత్తి ఎగుమతి పెరిగింది. పాలిస్టర్‌ వాడకం తగ్గడం కూడా పత్తి ధరలు పెరగడానికి కారణంగా వ్యాపారులు చెబుతున్నారు.

కొనుగోలు చేసిన పత్తిని లారీకి ఎత్తుతున్న కూలీలు

ఇంట్లోనే నిల్వ ఉంచా
బోరు బావి కింద అయిదెకరాల్లో పత్తి వేశాను. ఇటీవల తొలి తీత తీయగా దాదాపు 10 క్వింటాళ్ల దిగుబడి వచ్చింది. బహిరంగ మార్కెట్లో క్వింటా ధర దాదాపు రూ.14 వేలు పలుకుతుండగా రూ.10,500లకు అడుగుతున్నారు. తక్కువ ధరకు విక్రయించలేక ఇంట్లో మండి కట్టి నిల్వ ఉంచా- పసుపులేటి సుధాకర్, సోమేపల్లి, త్రిపురాంతకం