అమరావతిలో ప్లాట్ల పేరిట మోసం

ఎస్పీకి మార్కాపురం రైతుల ఫిర్యాదు

ఫిర్యాదిదారులతో మాట్లాడుతున్న ఎస్పీ మలికా గార్గ్‌

ఒంగోలు నేరవిభాగం, న్యూస్‌టుడే: అమరావతిలో ప్లాట్లు, అపార్టుమెంట్ల పేరిట తమను మోసగించారంటూ మార్కాపురం ప్రాంతానికి చెందిన పలువురు బాధితులు... పోలీసు స్పందనలో జిల్లా ఎస్పీ మలికా గార్గ్‌కు సోమవారం ఫిర్యాదు చేశారు. మార్కాపురం ప్రాంతానికి చెందిన పలువురు మిర్చి రైతులు... బిరుదులనరవ గ్రామానికి చెందిన శ్రీదేవి ట్రేడర్స్‌లో రావి వెంకటరెడ్డి ద్వారా విక్రయాలు జరిపేవారు. ఈ లావాదేవీల్లో భాగంగా కొంత నగదు ఇచ్చి మరికొంత నగదుకు ప్రామిసరీ నోట్లు రాసిచ్చేవారు. ఈక్రమంలో తమ బంధువులు రాజధాని అమరావతి ప్రాంతంలో రియల్‌ ఎస్టేట్‌ వ్యాపారం చేస్తున్నారని నమ్మబలికి... రైతులకు చెల్లించాల్సిన మొత్తాన్ని పెట్టుబడి పేరిట పెట్టించారు. సదరు నగదుకు సంబంధించి తమకు ఎటువంటి సమాధానం చెప్పడం లేదని... న్యాయం చేయాలని ఎస్పీని కోరారు. ● తన కుమారుడితో పాటు మరికొందరికి హౌసింగ్‌ బోర్డులో ఉద్యోగాలు ఇప్పిస్తానంటూ మోసగించిన వ్యక్తిపై చర్యలు తీసుకోవాలని... పొదిలికి చెందిన దర్శి సుబ్బారావు ఎస్పీకి ఫిర్యాదు చేశారు. ఒంగోలుకు చెందిన రాజేంద్ర కుమార్‌... హౌసింగ్‌ బోర్డులో అటెండర్‌ ఉద్యోగం ఇప్పిస్తామని రూ.లక్ష తీసుకుని మోసగించినట్లు చెప్పారు. ● ఒంగోలు నేతాజీనగర్‌లో ఫ్లాట్‌ ఇప్పిస్తానని వెంకటేశ్వరనగర్‌కు చెందిన కోడూరి హరిబాబు అనే వ్యక్తి రూ.50 వేలు తీసుకున్నాడని... ఫ్లాట్‌ ఇప్పించకుండా, అదేమని అడిగితే చంపేస్తామని బెదిరిస్తున్నాడని... ఒంగోలుకు చెందిన శ్యామల అనే మహిళ ఎస్పీకి ఫిర్యాదు చేశారు. ● పోలీసు స్పందన కార్యక్రమానికి జిల్లాలోని వివిధ ప్రాంతాల నుంచి 73 మంది హాజరై తమ సమస్యలు తెలియజేశారు. అదనపు ఎస్పీ (అడ్మిన్‌) కె.నాగేశ్వరరావు, అదనపు ఎస్పీ (క్రైమ్‌) ఆర్‌.శ్రీధర్‌రావు, ట్రాఫిక్‌ డీఎస్పీ మల్లికార్జునరావు, ఎస్‌బీ ఎస్పీ బి.మరియదాస్‌, ఎస్‌బీ-1 సీఐ రాఘవేంద్ర, న్యాయ సలహాదారు వేణుగోపాల్‌ తదితరులు పాల్గొన్నారు.