అనుమతిలేకుండా నిల్వచేసిన సిలిండర్లు స్వాధీనం

సిలిండర్లను పరిశీలిస్తున్న స్పెషల్‌ బ్రాంచి ఆధికారి సురేష్‌

చీమకుర్తి, న్యూస్‌టుడే : చీమకుర్తి కొత్తపేట బజారులో అనుమతి లేకుండా వివిధ గ్యాస్‌ కంపెనీలకు చెందిన సిలిండర్లు నిల్వ చేసిన ఇంటిపై స్పెషల్‌ బ్రాంచి పోలీసులు బుధవారం దాడి చేసి ఓ వ్యక్తిని అదుపులోకి తీసుకున్నారు. ప్రత్యేక విభాగం అధికారి సురేష్‌ తెలిపిన వివరాల మేరకు... కొత్తపేట బజారులో తాళ్లూరి రామకృష్ణ అనే వ్యక్తి ఎలాంటి అనుమతులు లేకుండా హెచ్‌పీ, ఇండేన్‌ గ్యాస్‌ సిలిండర్లను రీ ఫిల్లింగ్‌ చేసి గ్రానైట్‌ అనుబంధ పరిశ్రమలు, హోటళ్లకు అమ్మకాలు చేస్తున్నట్లు అందిన సమాచారంతో దాడులు నిర్వహించినట్లు చెప్పారు. ఈ సమయంలో ఓ కంపెనీకి చెందిన సిలిండర్లను సంబంధిత సిబ్బందితో గృహంలో దింపుతుండగా పట్టుకున్నారు. ఇంట్లో తనిఖీలు నిర్వహించగా రెండు కంపెనీలకు చెందిన నిండు సిలిండర్లు 29,  చిన్న ఖాళీ సిలిండర్లు 10,  పెద్ద ఖాళీ సిలిండర్లు 5లను (మొత్తం 44 సిలిండర్లు) స్వాధీనం చేసుకున్నట్లు చెప్పారు. గ్యాస్‌ రీ ఫిల్లింగ్‌ చేస్తున్న రామకృష్ణ, హెచ్‌పీ గ్యాస్‌ ఆటో నడుపుతున్న వెంగళ మణికంఠను అదుపులోకి  తీసుకొని పోలీసు స్టేషన్‌లో అప్పగించినట్లు సురేష్‌ చెప్పారు. నివాస గృహాల మధ్య ఈ రీతిలో పెద్ద ఎత్తున సిలిండర్లను నిల్వ చేసి రీఫిల్లింగ్‌ చేస్తున్న వ్యవహారం బయటకు రావడంతో స్థానికులు ఆందోళనకు గురయ్యారు. చీమకుర్తి పట్టణంలోని మరికొన్ని ప్రాంతాల్లో ఇదే రీతిలో కొందరు వ్యక్తులు అక్రమంగా గ్యాస్‌ సిలిండర్లు నిల్వ చేస్తూ అధిక ధరలకు అమ్మకాలు చేస్తున్నారనే వ్యాఖ్యానాలు వినిపిస్తున్నాయి. ఆయా విభాగాల అధికారులు ఈ విషయమై ప్రత్యేక దృష్టి సారించాలని పట్టణ వాసులు కోరుతున్నారు.