హత్య కేసులో నిందితుడి అరెస్టు

పొదిలి, న్యూస్‌టుడే: కొనకనమిట్ల మండలం గొట్లగట్టులో పగడాల హరికృష్ణారెడ్డి హత్యకేసులో ముద్దాయి కొప్పుల నరేంద్రరెడ్డి అలియాస్‌ నానిని అరెస్టు చేసినట్లు పొదిలి సీఐ యు.సుధాకరరావు తెలిపారు. సోమవారం పొదిలిలో హత్యకేసు వివరాలను ఆయన వెల్లడించారు. కొనకనమిట్ల మండలం గొట్లగట్టులో ఏప్రిల్‌ 15వ తేదీ రాత్రి ఆటో మొబైల్‌ సర్వీస్‌ దుకాణంలో పగడాల హరికృష్ణారెడ్డి హత్యకు గురయ్యాడు. ఈ హత్యపై హరికృష్ణారెడ్డి కుమారుడు పగడాల వెంకటేశ్వరరెడ్డి ఫిర్యాదు చేయడంతో కేసు నమోదు చేసి దర్యాప్తు చేపట్టినట్లు తెలిపారు. హనుమంతునిపాడు మండలం దొడ్డిచింతల గ్రామానికి చెందిన హరికృష్ణారెడ్డి గొట్లగట్టు ఆటో మొబైల్‌ అండ్‌ సర్వీస్‌ సెంటర్‌ దుకాణాన్ని నడుపుతున్నాడు. తన మేనమామ కొడుకైన కొప్పుల నరేంద్రరెడ్డిని తన వద్దనే ఉంచుకుని పని నేర్పిస్తున్నాడు. ఇంటి నిర్మాణపనులు చేసుకుంటూ  హరికృష్ణారెడ్డి కొన్ని రోజులు దుకాణానికి రాలేదు. దుకాణ లావాదేవీలన్నీ నరేంద్రరెడ్డి చూసుకుంటున్నాడు. 15వ తేదీ హరికృష్ణారెడ్డి దుకాణానికి వచ్చి డబ్బుల లెక్కలు చూడగా పది వేల రూపాయలు తేడా వచ్చింది. డబ్బుల విషయం నరేంద్రరెడ్డిని అడిగి నలుగురి ముందు తిట్టారు. ఈ విషయాన్ని నరేంద్రరెడ్డి మనస్సులో పెట్టుకుని అదే రోజు రాత్రి దుకాణంలో నిద్రపోతున్న హరికృష్ణారెడ్డిని కత్తితో గొంతు కోసి మోటారు సైకిల్‌పై పారిపోయాడు. నిందితుడు ఆదివారం గొట్లగట్టు వీఆర్వో వద్ద లొంగిపోయినట్లు సీఐ తెలిపారు. నిందితుడిని అరెస్టు చేసి పొదిలి కోర్టుకు హాజరుపరిచినట్లు ఆయన తెలిపాడు.

బాలిక తండ్రిపై కేసు నమోదు

కొమరోలు గ్రామీణం, న్యూస్‌టుడే: బాల్య వివాహాన్ని  జరిపించిన తండ్రిపై బాల్య వివాహ నిరోధక చట్టం కింద కేసు నమోదు చేసినట్లు ఎస్సై సాంబశివయ్య తెలిపారు. కొమరోలు మండలం యర్రగుంట్ల గ్రామానికి చెందిన ఓ వ్యక్తి తన కుమార్తెను తన మేనల్లుడికి ఇచ్చి ఈ నెల 7న వివాహం జరిపించారు. ఆ మేరకు సమాచారం అందుకున్న రెవెన్యూ, ఐసీడీఎస్‌ అధికారులు విచారణ నిర్వహించారు. బాల్య వివాహం చేసుకున్న వ్యక్తి, వివాహంలో పాల్గొన్న వారిపై కూడా ఈ చట్టం ద్వారా కేసు నమోదు చేసినట్లు ఎస్సై తెలిపారు.