ఉపాధి పేరిట విదేశాలకు పంపేవారిపై జాగ్రత్త

ఒంగోలు నేరవిభాగం, న్యూస్‌టుడే: విదేశాల్లో ఉపాధి చూపిస్తామని చెప్పి, డబ్బు కాజేసి మోసాలకు పాల్పడుతున్న ఏజెంట్ల పట్ల ప్రజలు అప్రమత్తంగా ఉండాలని జిల్లా ఎస్పీ మలికా గార్గ్‌ సూచించారు. ఇటీవల కాలంలో పెద్దసంఖ్యలో నకిలీ ఏజెన్సీలు దేశంలోని గృహ కార్మికులకు ఉపాధి ఆశచూపి మోసాలకు పాల్పడ్డాయని వివరించారు. భారీ మొత్తాలు కాజేసి చట్టవిరుద్ధంగా కువైట్‌ పంపారని.. పలువురు బాధితులు అక్కడి భారత రాయబార కార్యాలయాన్ని ఆశ్రయించారని పేర్కొన్నారు. తమను తిరిగి స్వదేశానికి రప్పించడానికి నకిలీ ఏజెంట్లు భారీ మొత్తంలో నగదు డిమాండ్‌ చేస్తున్నారని వారు వాపోయారన్నారు. కొవిడ్‌-19 ప్రయాణ ఆంక్షలను సడలించిన తర్వాత కూడా నకిలీ ఏజెంట్లు ప్రతిరోజూ పెద్దసంఖ్యలో పనిమనుషులను కువైట్‌ తరలిస్తున్నారన్నారు. ప్రొటెక్టర్‌ ఆఫ్‌ ఇమ్మిగ్రెంట్స్‌ ద్వారా రిజిస్టర్‌ అయిన ఏజెంట్లు మాత్రమే వీరిని విదేశాలకు పంపవచ్చని తెలిపారు. అలాగే వలస కార్మికులు ఉపాధి వీసాపై మాత్రమే విదేశాలకు వెళ్లవచ్చని ఎస్పీ స్పష్టం చేశారు. అక్రమ రిక్రూట్‌మెంట్‌ ఏజెంట్ల కార్యకలాపాలపై సమాచారం తెలిస్తే స్పెషల్‌ బ్రాంచి డీఎస్పీ చరవాణి నంబర్‌: 9121102104 కు తెలియజేయాలని సూచించారు.