ప్రైవేటు ట్రావెల్‌ బస్సు ప్రయాణికుల ఆందోళన

సింగరాయకొండ గ్రామీణం, న్యూస్‌టుడే: విజయవాడ నుంచి తిరుపతి వెళ్లాల్సిన శ్రీకృష్ణ ప్రైవేటు ట్రావెల్‌ బస్సు మరమ్మతులకు గురై బుధవారం తెల్లవారుజామున 4 గంటలకు మండలంలోని పాత సింగరాయకొండ వద్ద జాతీయ రహదారిపై ఆగిపోయింది. అయితే బస్సు సిబ్బంది, యాజమాన్యం సక్రమంగా స్పందించకపోవడంతో అందులో ఉన్న 35 మంది ప్రయాణికులు నిరసన తెలిపారు. వేరే బస్సు ఏర్పాటు చేయాలని కోరినా డ్రైవర్‌ స్పందించలేదని, యాజమాన్యానికి ఫోన్‌ చేసినా సరైన సమాధానం రాకపోవడంతో ప్రయాణికులు 100 ద్వారా పోలీసులకు ఫిర్యాదు చేశారు. వెంటనే స్పందించిన సింగరాయకొండ ఎస్సై ఫిరోజ్‌ ఫాతిమా, సిబ్బందితో సంఘటనా స్థలానికి చేరుకున్నారు. ప్రయాణికులు, బస్సు సిబ్బంది నుంచి వివరాలు తీసుకొని యాజమాన్యంతో మాట్లాడారు. దీంతో గురువారం ఉదయం 10 గంటలకు వారు వేరే బస్సు ఏర్పాటు చేసి ప్రయాణికులను గమ్యస్థానాలకు చేర్చారు.