మంత్రి కాన్వాయ్‌ను అడ్డుకునే యత్నం

హత్యకేసు నిందితుల ఇంటికి వెళ్లి వస్తుండగా ఘటన

మహిళలను నిలువరిస్తున్న పోలీసులు

యర్రగొండపాలెం, న్యూస్‌టుడే: వై.పాలెంలో ఓ ప్రైవేటు కార్యక్రమానికి వచ్చిన మంత్రి ఆదిమూలపు సురేష్‌ కాన్వాయ్‌ను కొంతమంది బుధవారం అడ్డుకున్నారు. వైపాలెంలో స్థిరాస్తి వ్యాపారి అచ్యుత ఆదినారాయణ మార్చిలో హత్యకు గురైన విషయం తెలిసిందే ఈకేసులో నిందితులుగా ఉన్న వ్యక్తుల ఇంటికి మంత్రి వెళ్లి రావడాన్ని బాధిత కుటుంబసభ్యులు ఆక్షేపించారు. దీనిపై బ్యాంకు బజారులో నిరసన వ్యక్తం చేస్తూ మంత్రి కాన్వాయ్‌ను అడ్డుకోబోయారు. పోలీసులు వారిని వారించి పక్కకు తీసుకెళ్లి వాహనాలను పంపించేశారు. తమకు న్యాయం చేయమని ఎన్నిసార్లు మొరపెట్టుకున్నా పట్టించుకోలేదని బాధితులు ప్రశ్నించారు. ఆదినారాయణ కుటుంబ సభ్యులను పోలీసులు పిలిపించి సమస్య తెలుసుకొని పంపించేశారు. మంత్రికి అర్జీ ఇచ్చేందుకే తాము వచ్చినట్లు వారి తెలిపారని ఎస్సై రామకోటయ్య పేర్కొన్నారు. ఘటన అనంతరం హతుడి కుటుంబసభ్యులు, ఎఫ్‌ఐఆర్‌లో పేర్లు ఉన్న వారి కుటుంబసభ్యులు పరస్పరం దూషించుకోవడంతో గొడవలు జరక్కుండా పోలీసులు సర్దిచెప్పి అక్కడినుంచి పంపించేశారు.