పార్టీని గెలిపించాలి

‌ ఎరిక్షన్‌బాబుతో తెదేపా అధినేత చంద్రబాబు

ఎరిక్షన్‌బాబుతో మాట్లాడుతున్న చంద్రబాబు

యర్రగొండపాలెం, న్యూస్‌టుడే: యర్రగొండపాలెం నియోజకవర్గ తెదేపా ఇన్‌ఛార్జి గూడూరి ఎరిక్షన్‌బాబుతో పార్టీ అధినేత చంద్రబాబునాయుడు గురువారం సమావేశమయ్యారు. విజయవాడలోని పార్టీ కార్యాలయానికి పిలిపించి మాట్లాడారు. ఇన్‌ఛార్జి మీరేనని స్పష్టం చేశారు. రాబోయే ఎన్నికల్లో పార్టీని గెలిపించాలని.. అందరినీ కలుపుకొనిపోవాలని ఎరిక్షన్‌బాబుకు సూచించినట్లు తెలిసింది. ఈ విషయమై బుధవారమే నియోజకవర్గ సీనియర్‌ నేత డాక్టర్‌ మన్నే రవీంద్రను చంద్రబాబు పిలిపించి మాట్లాడారు. పార్టీ నిర్ణయానికి కట్టుబడి పనిచేస్తామని రవీంద్ర చెప్పినట్లు తెలిసింది. కాగా పార్టీ తనకు అప్పగించిన బాధ్యతలను సమర్థవంతంగా నిర్వహిస్తానని ఎరిక్షన్‌బాబు ఈ సందర్భంగా తెలిపారు. రాబోయే ఎన్నికల్లో తెదేపా అభ్యర్థిగా ఎరిక్షన్‌బాబుకు సంకేతం అందినట్లేనని నాయకులు హర్షం వ్యక్తంచేస్తూ దోర్నాలలో బాణసంచా కాల్చారు.