కన్నీటి తడి

ట్యాంకర్లతో పంటను కాపాడుకుంటున్న రైతులు

ట్యాంకర్‌ నీటిని పొలాల వద్ద ఉన్నకుంటల్లో నింపుతున్న దృశ్యం

త్రిపురాంతకం, న్యూస్‌టుడే: యర్రగొండపాలెం నియోజకవర్గంలోని వివిధ గ్రామాల రైతులు పంట పొలాలకు నీటి సౌకర్యం లేక అగచాటు పడుతున్నారు. ఉన్న బోర్ల నుంచి నీరు రాకపోవడం, కొత్తవి వేసినా ప్రయోజనం లేక త్రిపురాంతకంలోని సాగర్‌ జలాలను ట్యాంకర్ల ద్వారా తీసుకొచ్చి తడుపుతున్నారు. ఈ నియోజకవర్గంలో ఆశించిన స్థాయిలో వర్షాలు పడకపోవడంతో భూగర్భజలాలు పడిపోయాయి. బోరుబావులను నమ్ముకుని పంటలు సాగుచేస్తే చివరకు అవీ వట్టిపోయాయి. ప్రస్తుతం సుమారు 15 వేల హెక్టార్లలో మిర్చి వేశారు. ఇది పూత దశలో ఉండటంతో జాగ్రత్తగా కాపాడుకోవాల్సి ఉంది. నీటి తడి కొద్దిగా ఆలస్యమైనా దెబ్బతినే అవకాశం ఉంది. యర్రగొండపాలెం మండలంలోని ఆమనిగుడిపాడు, బోయలపల్లి, గురిజేపల్లి, గోళ్లవిడిపి, అయ్యంబొట్లవారిపల్లి గ్రామాలతో పాటు.. త్రిపురాంతకం మండలం రామసముద్రం, దువ్వలి గ్రామాల్లో భూగర్భ నీటి వనరులు చాలా తక్కువ. బోరు వేసినా నీరు పడుతుందో లేదో చెప్పలేని పరిస్థితి. దీంతో కొందరు రైతులు సుమారు 10కి పైగా లారీ ట్యాంకర్లను బాడుగకు తీసుకున్నారు. 15 కిలోమీటర్ల దూరంలో ఉన్న సాగర్‌ జలాలను తీసుకొచ్చి పొలాల్లో తవ్వి సిద్ధం చేసుకున్న కుంటల్లో నిల్వ చేసుకుంటున్నారు. అనంతరం మిర్చి పంటకు నీరు పెడుతున్నారు. ఇందుకు రూ.లక్షల్లో ఖర్చవుతుంది. మూడు ట్యాంకర్ల ద్వారా తెచ్చినా ఎకరా పంటకు కూడా సరిపోవడం లేదని తెలిపారు. తాను 15 ఎకరాల్లో మిర్చి వేశానని, అధిక సొమ్ము వెచ్చించి రెండు లారీ ట్యాంకర్లతో నీటిని తీసుకువస్తున్నట్లు ఆమనిగుడిపాడు గ్రామ రైతు జి.వెంకటేశ్వర్లు తెలిపారు.