‘సీఎం సభలో బుర్కాల తొలగింపు దారుణం’

కలెక్టరేట్‌ వద్ద ధర్నా చేస్తున్న తెదేపా మైనార్టీ విభాగం నాయకులు

ఒంగోలు గ్రామీణం, న్యూస్‌టుడే: ముఖ్యమంత్రి జగన్‌ మోహన్‌ రెడ్డి పాల్గొన్న నరసాపురం బహిరంగ సభకు హాజరైన ముస్లిం మహిళల బుర్కాలను తొలగించడం దారుణమని తెదేపా మైనార్టీ విభాగం ఒంగోలు పార్లమెంట్‌ అధ్యక్షుడు షేక్‌ రసూల్‌ మహమ్మద్‌ విమర్శించారు. ఈ మేరకు తెదేపా మైనార్టీ విభాగం ఆధ్వర్యంలో ఒంగోలులోని కలెక్టరేట్‌ వద్ద సోమవారం ధర్నా నిర్వహించారు. ఈ సందర్భంగా రసూల్‌ మాట్లాడుతూ.. బహిరంగ సభకు ముస్లిం మహిళలు తమ బుర్కాలు, ఇతరుల నల్ల చున్నీలు తొలగించి రావాల్సిందిగా ఆదేశించి అవమానపరిచారని ఆవేదన వ్యక్తం చేశారు. ఇటువంటి సంఘటనలు పునరావృతం కాకుండా చూడాలన్నారు. మహిళలను అగౌరవ పరచడం తగదన్నారు. రాష్ట్ర మైనార్టీ విభాగం ఉపాధ్యక్షుడు కపిల్‌బాషా మాట్లాడుతూ.. మైనార్టీ ఫైనాన్స్‌ కార్పొరేషన్‌ ద్వారా వ్యక్తిగత రుణాల మంజూరు చేయడంతో పాటు, ఇస్లామీ బ్యాంక్‌ ఏర్పాటు చేయాలని డిమాండ్‌ చేశారు. రంజాన్‌ తోఫాను పునరుద్ధరించడంతో పాటు, ఇమాం మౌజన్లందరికి గౌరవ వేతనం ఇవ్వాలని కోరారు. ధర్నాలో తెదేపా నాయకులు షేక్‌ అన్వర్‌బాషా, ఆరీఫా, ముంతాజ్‌ తదితరులు పాల్గొన్నారు.