అనారోగ్యంతో తండ్రి.. ప్రమాదంలో కుమార్తె

గంటల వ్యవధిలో కన్నుమూత
రాజుపాలెంలో విషాదం

చిన్న రాములు,   సామ్రాజ్యం (పాత చిత్రాలు )

త్రిపురాంతకం, న్యూస్‌టుడే: తన తండ్రి చనిపోయారని తెలిసి ఆమె హుటాహుటిన స్వగ్రామం చేరుకున్నారు. అంత్యక్రియల్లో పాల్గొనేందుకు వెళ్తుండగా ఓ కారు ఢీకొనడంతో అక్కడికక్కడే ప్రాణాలు కోల్పోయారు. కళ్లముందు జరిగిన ఈ సంఘటనతో బంధువులు, గ్రామస్థులు విషాదంలో మునిగిపోయారు. ఈ సంఘటన త్రిపురాంతకం మండలం సోమేపల్లి అడ్డరోడ్డు వద్ద అనంతపురం-అమరావతి జాతీయ రహదారిపై మంగళవారం చోటు చేసుకుంది. కుటుంబ సభ్యులు తెలిపిన వివరాల ప్రకారం.. రాజుపాలేనికి చెందిన వల్లెపు చిన్న రాములు (80) అనారోగ్యంతో సోమవారం రాత్రి ఇంటి వద్ద మృతి చెందారు. ఆయన రెండో కుమార్తె ఉప్పు సామ్రాజ్యం (45) ప్రస్తుతం కూలి పనులు చేసుకుంటూ కడపలో ఉంటున్నారు. తండ్రి మరణ వార్త తెలిసి మంగళవారం తెల్లవారుజామున ఆమె గ్రామానికి చేరుకున్నారు. సోమేపల్లి అడ్డరోడ్డు సమీపంలోని పొలంలో అంత్యక్రియలు నిర్వహించేందుకు మంగళవారం సాయంత్రం మృతదేహాన్ని తీసుకుని బంధువులు, కుటుంబ సభ్యులు బయలుదేరారు. వారిని ఆమె అనుసరించారు. ఇంతలో గుంటూరు వైపు వెళ్తున్న కారు ఆమెను ఢీకొట్టింది. తలకు బలమైన గాయాలు తగిలి సామ్రాజ్యం అక్కడికక్కడే ప్రాణాలు కోల్పోయారు. గంటల వ్యవధిలోనే తండ్రి కుమార్తెలు మృతి చెందడంతో ఆ కుటుంబంలో తీవ్ర విషాదం నెలకొంది. దుఃఖాన్ని దిగమింగుకుంటూ చిన్న రాములుకు అంత్యక్రియలు నిర్వహించారు. పోలీసులు సామ్రాజ్యం మృతదేహాన్ని పోస్టుమార్టం నిమిత్తం యర్రగొండపాలెం ప్రభుత్వాసుపత్రికి తరలించారు. ఆమె భర్త గతంలోనే మృతిచెందారు. వారికి ఇద్దరు కుమారులు, కుమార్తె ఉన్నారు. కూలి పనులు చేసుకుంటూ పిల్లలను ఆమె చదివించారు. ప్రస్తుతం రెండో కుమారుడు వినోద్‌ సాఫ్ట్‌వేర్‌ ఉద్యోగం చేస్తున్నారు.