విద్యే పిల్లలకు ఇచ్చే విలువైన ఆస్తి

విద్యార్థులకు చెక్కు అందజేస్తున్న కలెక్టర్‌ దినేష్‌కుమార్‌, చిత్రంలో విద్యాశాఖ అధికారులు

ఒంగోలు గ్రామీణం, న్యూస్‌టుడే: విద్యే పిల్లలకు అందించే విలువైన ఆస్తి అని కలెక్టర్‌ దినేష్‌కుమార్‌ పేర్కొన్నారు. కొవిడ్‌ కారణంగా తల్లిదండ్రులిద్దరూ లేదా తల్లిని కోల్పోయిన విద్యార్థులకు ‘జగనన్న అమ్మఒడి’ నిధుల విడుదల కార్యక్రమాన్ని బుధవారం నిర్వహించారు. ఈ సందర్భంగా ఆయన మాట్లాడుతూ... అమ్మఒడి సాయాన్ని ప్రభుత్వం నేరుగా తల్లుల బ్యాంకు ఖాతాలో జమ చేస్తోందన్నారు. కొవిడ్‌ కారణంగా తల్లిని కోల్పోయిన విద్యార్థులకు మాత్రం... వారి ఖాతాలోనే నిధులు జమ చేయాలని నిర్ణయించినట్లు తెలిపారు. ఆ మేరకు జిల్లాలోని 118 మంది విద్యార్థుల ఖాతాల్లో రూ.15.34 లక్షలు జమ చేస్తున్నట్లు తెలిపారు. సంబంధిత చెక్కును విద్యార్థులకు అందజేశారు. డీఈవో విజయభాస్కర్‌, ఉప విద్యాశాఖాధికారి అనితా రోజ్‌రాణి, గ్రామ, వార్డు సచివాలయాల జిల్లా ఇన్‌ఛార్జి ఉషారాణి తదితరులు పాల్గొన్నారు.