మళ్లీ పెద్దపులి దాడి

అర్థవీడు, న్యూస్‌టుడే: పెద్దపులి దాడిలో మరో ఆవు మృతి చెందిన సంఘటన మండలంలో శుక్రవారం వెలుగు చూసింది. మాగుటూరు గ్రామానికి చెందిన పది మంది పశువుల కాపర్లు లక్ష్మీపురం సమీపంలోని శంఖరాపురం నూతన రహదారిని ఆనుకుని ఒక దొడ్డిని ఏర్పాటు చేసుకున్నారు. పగలంతా సమీప కొండ ప్రాంతాల్లో ఆవులను మేపుతూ.. చీకటి పడితే అందులో ఉంచుతున్నారు. వారం రోజుల క్రితం 70 ఆవుల మందను పక్కనే కొండ ప్రాంతంలో మేతకు తోలారు. ఈ సమయంలో పెద్దపులి దాడి చేయడంతో ఒకటి మృతి చెందింది. దీంతో భయపడిన కాపరులు ఆవులను అక్కడ ఏర్పాటు చేసిన దొడ్డిలో ఉంచకుండా మాగుటూరుకు తరలించారు. గ్రామ సమీపంలోనే వాటిని ఉంచుతున్నారు. గురువారం అర్ధరాత్రి సమయంలో నాలి నాగేశ్వరరావుకు చెందిన ఒక ఆవుపై పెద్దపులి దాడి చేసి సమీపంలోని చెట్లలోకి ఈడ్చుకెళ్లి చంపేసింది. ఈ విషయాన్ని కాపరులు శుక్రవారం గుర్తించి అటవీ శాఖ అధికారులకు సమాచారం అందించారు. విషయం తెలుసుకున్న నాగులవరం సెక్షన్‌ డీఆర్వో ప్రసాద్‌రెడ్డి, బీట్‌ అధికారి అండ్రూస్‌ సంఘటనా స్థలాన్ని పరిశీలించారు. ఆవు కళేబరానికి పంచనామా నిర్వహించారు. గ్రామానికి కూత వేటు దూరంలోనే పులి దాడి చేయడంతో సమీప ప్రజలు, రైతులు,  కాపరులు భయాందోళనకు గురవుతున్నారు. వేట రుచి మరిగిన పులి ఈ ప్రదేశాన్ని త్వరగా వదలి పోదని చెబుతున్నారు. పులిని ఈ ప్రాంతం నుంచి తరిమే ఏర్పాట్లు చేయాలని అటవీ శాఖ అధికారులను కోరుతున్నారు.