భూ సేకరణ ప్రక్రియ వేగవంతం

మాట్లాడుతున్న ప్రత్యేక కలెక్టర్‌ సరళా వందనం, చిత్రంలో    కనిగిరి ఆర్డీవో సందీప్‌కుమార్‌

ఒంగోలు గ్రామీణం, న్యూస్‌టుడే: వెలిగొండ ప్రాజెక్ట్‌ పునరావస కాలనీల్లో అభివృద్ధి పనులు వేగవంతం చేయాలని భూ సేకరణ విభాగం ప్రత్యేక కలెక్టర్‌ సరళా వందనం పేర్కొన్నారు. జిల్లాలోని పలు ప్రాజెక్టుల భూ సేకరణ ప్రక్రియపై ప్రకాశం భవన్‌లో శనివారం నిర్వహించిన సమావేశంలో మాట్లాడారు. సచివాలయ, ఆర్‌బీకే, డిజిటల్‌ గ్రంథాలయాల నిర్మాణానికి ఆర్‌అండ్‌ఆర్‌ కాలనీల్లో స్థలాలు కేటాయించాలన్నారు. తీగలేరుకు సంబంధించి యర్రగొండపాలెం, పుల్లలచెరువు మండలాల్లో ప్రభుత్వ, అసైన్డ్‌ భూములు గుర్తించాలన్నారు. డీఆర్వో ఓబులేసు మాట్లాడుతూ... బెంగళూరు ఎక్స్‌ప్రెస్‌ హైవే నిర్మాణానికి పీసీపల్లి, పామూరు ప్రాంతాల్లో భూ సేకరణ పూర్తి చేయాలన్నారు. 544డీ రహదారికి సంబంధించి కంభం, బేస్తవారపేట, కొమరోలు మండలాల్లో భూ సేకరణ విషయమై పలు సూచనలు చేశారు. చీరాల రోడ్డు కింద వేటపాలెం, చినగంజాం ప్రాంతాల్లో భూములు కోల్పోయిన రైతులను గుర్తించి పరిహారం అందజేయాలన్నారు. ఆర్డీవో సందీప్‌కుమార్‌, రెవెన్యూ, సర్వే, జాతీయ రహదారి అధికారులు పాల్గొన్నారు.