ఎస్సీ, ఎస్టీ కేసు నీరుగారుస్తున్నారని ఆందోళన

ప్రదర్శనగా సాగుతున్న అంబేడ్కర్‌ ఆశయ సాధన సమితి సభ్యులు

ఒంగోలు గ్రామీణం, న్యూస్‌టుడే: కొండపి మండలం కె.ఉప్పలపాడుకు చెందిన ఎస్సీ, ఎస్టీ కేసులో నిందితులను తక్షణమే అరెస్ట్‌ చేయాలంటూ అంబేడ్కర్‌ ఆశయ సాధన సమితి ఆధ్వర్యంలో కలెక్టరేట్‌ సమీపంలోని విగ్రహం వద్ద శనివారం నిరసన చేపట్టారు. సమితి రాష్ట్ర అధ్యక్షుడు బిళ్లా చెన్నయ్య మాట్లాడుతూ... గ్రామంలోని ఎస్సీ, ఎస్టీ కేసును నీరుగార్చేందుకు పోలీసులు ప్రయత్నిస్తున్నారని ఆరోపించారు. నిందితులను రక్షించేందుకు ప్రయత్నిస్తున్న అధికారులను సస్పెండ్‌ చేయాలని డిమాండ్‌ చేశారు. కేసులో సాక్ష్యంగా ఉన్న దళితులపై పెట్టిన కేసును రద్దు చేయాలన్నారు. పొదిలి మండలం మూగచింతలలో దళితులు సాగు చేసుకుంటున్న భూములను అక్రమంగా ఆన్‌లైన్‌ చేసుకుని ఇబ్బందులకు గురిచేస్తున్న వారిపైనా చర్యలు తీసుకోవాలని డిమాండ్‌ చేశారు. అనంతరం డీఆర్వో ఓబులేసుకు వినతిపత్రం అందజేశారు. ముందుగా అంబేడ్కర్‌ భవన్‌ నుంచి కలెక్టరేట్‌ వరకు ర్యాలీ నిర్వహించారు.