పంట రక్షణకు వినూత్న ఆలోచన

ఒంగోలుకు చెందిన లారీల యజమాని జలీల్‌కు కొత్తపట్నం మండలం సముద్ర తీర ప్రాంతం సమీపంలోని పాదర్తిలో కొంత పొలం ఉంది. ఇసుక నేలలు కావడంతో సాధారణంగా చామదుంప, వేరుశెనగ వంటి పంటలు పండిస్తుంటారు. సముద్రం నుంచి వచ్చే పడమటి గాలుల తీవ్రతకు ఆకులకు రంధ్రాలు పడి కొంతమేర నష్టం ఏర్పడుతోంది. పొలాల మధ్యలో ఉన్న గట్లు కూడా ఇసుకతో పూడి పోతుంటాయి. దీంతో జలీల్‌ ఓ ఆలోచన చేశారు. తన వద్ద ఉన్న లారీల పాత టైర్లను దాదాపు 160 వరకు పొలం వద్దకు తీసుకువచ్చారు. గట్ల బదులు వీటిని భూమిలో సగం వరకు పాతారు. తద్వారా గాలి నేరుగా మొక్కలకు తగలకుండా అడ్డుకట్ట పడుతుందని తెలిపారు. పైగా టైర్ల నుంచి వచ్చే వాసనకు కొన్ని విష పురుగులు కూడా పంటల దరికి చేరడం లేదన్నారు.

ఈనాడు, ఒంగోలు