3 నెలలు.. కిలో బియ్యమూ ఇవ్వలేదు

కార్డులు చూపుతూ ఆందోళన చేస్తున్న బుడ్డాయపల్లి గ్రామస్థులు

కనిగిరి, న్యూస్‌టుడే: తమకు తెల్లరేషన్‌ కార్డులున్నప్పటికీ మూడు నెలలుగా బియ్యం ఇవ్వడం లేదంటూ కనిగిరి మండలం బుడ్డాయపల్లి వాసులు ఆవేదన వ్యక్తం చేశారు. ఈ మేరకు గ్రామంలో బుధవారం ఆందోళన చేశారు. తామందరం పేదలమని.. కూలి పనులకు వెళ్లి జీవనం సాగిస్తున్నట్టు చెప్పారు. ప్రభుత్వం సరఫరా చేసే రూపాయికి కిలో బియ్యాన్ని డీలర్‌ గత మూడు నెలలుగా ఇవ్వకుండా మాయం చేస్తున్నారని ఆరోపించారు. ఈ విషయమై అధికారులకు ఎన్నిసార్లు విన్నవించుకున్నప్పటికీ పట్టించుకోవడం లేదని ఆవేదన వ్యక్తం చేశారు. గ్రామంలో సుమారు 200 వరకు రేషన్‌ కార్డులున్నాయని.. ఏ ఒక్కరికీ కిలో బియ్యం కూడా ఇవ్వడం లేదన్నారు. ఉన్నతాధికారులు స్పందించి డీలర్‌పై చర్యలు తీసుకుని.. తమకు వెంటనే బియ్యం అందించేలా చూడాలని కోరారు.