ఎవరూ స్పందించలేదు

సబ్‌ కలెక్టర్‌ కార్యాలయంలో ఇదీ పరిస్థితి

స్పందనలో అధికారులు లేక ఖాళీగా దర్శనమిస్తున్న కుర్చీలు

మార్కాపురం సబ్‌ కలెక్టర్‌ కార్యాలయంలో సోమవారం నిర్వహించిన ‘స్పందన’లో పరిస్థితి చూశారా.. ఎంతోమంది ప్రజలు తమ సమస్యలు విన్నవించుకోవడానికి వచ్చే ఈ కార్యక్రమానికి వివిధ శాఖల అధికారులే డుమ్మా కొట్టారు. సబ్‌ కలెక్టర్‌ సేతుమాధవన్‌ ప్రయాణిస్తున్న కారు ఇటీవల చీమకుర్తి వద్ద ప్రమాదానికి గురవడంతో అప్పటినుంచి ఆయన సెలవులో ఉన్నారు. ఆయన ఉన్నప్పుడు ప్రతిఒక్క అధికారి తప్పనిసరిగా ‘స్పందన’కు హాజరయ్యేవారు. వచ్చిన అర్జీలను పరిష్కరించమని సేతు మాధవన్‌ అందించేవారు. కానీ ఈసారి పరిస్థితి భిన్నం. ఆయన లేరని తెలియడంతో మున్సిపల్‌ కమిషనర్‌, డీడీవో, డీఎల్‌పీవో, ఏవో మినహా మిగిలిన అధికారులెవరూ హాజరుకాలేదు. దీంతో వారి కోసం ఏర్పాటుచేసిన కుర్చీలన్నీ ఖాళీగా దర్శనమిచ్చాయి. అర్జీలను సంబంధితశాఖలకు పంపించాలంటూ ఇన్‌ఛార్జి డీఏవో హరి సిబ్బందికి ఆదేశించారు.
న్యూస్‌టుడే, మార్కాపురం అర్బన్‌