విద్యార్థిని మృతితో బాలికల్లో కలత

సందర్శించి ధైర్యం చెప్పిన అధికారిణి

విద్యార్థినులతో మాట్లాడుతున్న మాధవీలత

దొనకొండ, న్యూస్‌టుడే: స్థానిక కస్తూర్బా బాలికల పాఠశాలలో ఇటీవల చోటు చేసుకున్న కొన్ని సంఘటనలతో అక్కడి వారు కలత చెందుతున్నారు. ఈ నేపథ్యంలో మంగళవారం జిల్లా బాలికల డెవలప్‌మెంట్‌ అధికారిణి సిహెచ్‌. మాధవీలత స్థానిక కస్తూర్బా గాంధీ బాలికల గురుకుల పాఠశాలను సందర్శించారు. విద్యార్థినుల్లో కొందరు ఆందోళన చెందుతున్నారని, ఎలాంటి భయానికి లోను కావద్దని వారికి భరోసా కల్పించామన్నారు. అనారోగ్యానికి గురై ఓ విద్యార్థిని మృతి చెందటం .. అదే సమయంలో పాఠశాలలోని మరికొందరు అస్వస్థతకు గురవ్వడంతో వారు వేదన చెందారని వారికి తగిన సూచనలు, సలహాలిచ్చామన్నారు. ఇటీవలి సంఘటనలపై విచారిస్తున్నామని, తప్పు సిబ్బంది వైపు ఉంటే కఠిన చర్యలు తీసుకుంటామని మంగళవారం తనిఖీలో భాగంగా హెచ్చరించారు. శుద్ధ జల ప్లాంటులో నీరు సరిగా లేదని చెప్పారని, నీటిని పరీక్షలకు పంపించి వచ్చిన నివేదిక ఆధారంగా ముందుకు వెళతామన్నారు. మెనూ ప్రకారం భోజనాలు సమకూర్చాలని, ఏమైనా ఇబ్బందులు ఎదురైతే ఉన్నతాధికారులు, ఆరోగ్య సిబ్బందితో మాట్లాడి వారి ఆదేశాల ప్రకారం చేయాలన్నారు. ఈ కార్యక్రమంలో ఎంఈవో సాంబశివరావు, తదితరులు పాల్గొన్నారు.