అనిశా వలలో కొండపి ఎస్సై, కానిస్టేబుల్‌

పట్టుబడిన ఎస్సై రామకృష్ణ, కానిస్టేబుల్‌ కోటేశ్వరరావు

కొండపి, ఒంగోలు నేరవిభాగం, న్యూస్‌టుడే: లంచం తీసుకుంటూ కొండపి స్టేషన్‌ ఎస్సై కె.రామకృష్ణ, కానిస్టేబుల్‌ జి.కోటేశ్వరరావు అలియాస్‌ కోటి బుధవారం అవినీతి నిరోధక శాఖ అధికారులకు(అనిశా) చిక్కారు. వివరాలిలా ఉన్నాయి.. కొండపి మండలం కట్టావారిపాలేనికి చెందిన అంగలకుర్తి రాములు కుమారులు వెంకటేశ్వర్లు, మధు మూడెకరాల భూమి విషయంలో తరచూ వివాదాలకు దిగుతూ పోలీసులకు ఫిర్యాదు చేసుకుంటున్నారు. వెంకటేశ్వర్లు కుమారుడు మస్తాన్‌పై కూడా ఫిర్యాదు అందింది. మస్తాన్‌ను తప్పించేందుకు స్థానిక పోలీసులు రూ.35వేలు లంచం తీసుకున్నట్లు అభియోగం. ఈ కేసులు నడుస్తుండగానే.. వెంకటేశ్వర్లు తనను అకారణంగా దూషిస్తూ, వేధిస్తున్నాడని అదే గ్రామానికి చెందిన మహిళ పోలీసులకు ఫిర్యాదు చేశారు. దీంతో కేసు నమోదు చేశారు. ఇంతలోనే మరో వ్యక్తి కూడా వెంకటేశ్వర్లు తనను కులం పేరిట దూషించారంటూ ఫిర్యాదు చేశారు. మహిళను దూషించిన కేసులో 41 సీఆర్‌పీసీ నోటీసు ఇస్తామని.. అలాగే ఎస్సీ, ఎస్టీ అట్రాసిటీ కేసు నమోదు చేయకుండా ఉండటానికి లంచం ఇవ్వాలని ఎస్సై రామకృష్ణ, కానిస్టేబుల్‌ కోటేశ్వరరావు డిమాండ్‌ చేశారు. అప్పటికే తన కుమారుడి కేసులో రూ.35 వేలు ఇచ్చిన వెంకటేశ్వర్లు మరోసారి ఇవ్వడం ఇష్టంలేక ఈ విషయాన్ని అనిశా అధికారుల దృష్టికి తీసుకొచ్చారు. అధికారులు పక్కా ప్రణాళిక రచించి వెంకటేశ్వర్లు రూ.20 వేలు ఇస్తుండగా ఎస్సైతో పాటు కానిస్టేబుల్‌ను అదుపులోకి తీసుకున్నారు. అనిశా జిల్లా ఇన్‌ఛార్జి డీఎప్పీ టి.వి.వి.ప్రతాప్‌కుమార్‌ ఆధ్వర్యంలో ఇన్‌స్పెక్టర్లు రవికుమార్‌, మన్మథరావు(గుంటూరు జిల్లా) శేషు, శ్రీనివాసరావు, అపర్ణ(ప్రకాశం) ఒంగోలు యూనిట్‌ ఎస్సైలు జె.వి.ఎన్‌.ప్రసాద్‌, ప్రసాద్‌ ఈ దాడిలో పాల్గొన్నారు.