‘నిబంధనలతో పేదలకు విదేశీ విద్య దూరం’

అంబేడ్కర్‌ విగ్రహం వద్ద నిరసన తెలుపుతున్న తెదేపా నాయకులు

ఒంగోలు గ్రామీణం, న్యూస్‌టుడే: క్యూఎస్‌ 200 విశ్వవిద్యాలయాల పేరిట విదేశీ విద్యా పథకం లబ్ధిదారులను తగ్గించడాన్ని నిరసిస్తూ... తెలుగుదేశం పార్టీ ఆధ్వర్యంలో హెచ్‌సీఎం కళాశాల ఎదుట ఉన్న అంబేడ్కర్‌ విగ్రహం వద్ద బుధవారం ఆందోళన చేపట్టారు. పార్టీ జిల్లా మాజీ ప్రధాన కార్యదర్శి గుర్రాల రాజ్‌విమల్‌ మాట్లాడుతూ... వైకాపా అధికారంలోకి వచ్చాక విదేశీ విద్యా పథకాన్ని మూడున్నరేళ్లగా నిలిపివేసి పేద విద్యార్థులకు తీరని అన్యాయం చేసిందని విమర్శించారు. ఇప్పుడు కొత్త నిబంధనలు అమల్లోకి తెచ్చి... రాష్ట్రవ్యాప్తంగా కేవలం 213 మందికి రూ.19 కోట్లు మాత్రమే కేటాయించడం ఏమిటని ప్రశ్నించారు. క్యూఎస్‌ 200లోపు విశ్వవిద్యాలయం నిబంధనను తొలగించాలని డిమాండ్‌ చేశారు. పార్టీ నాయకులు హగయ్యరాజు, చుండి శ్యామ్‌, కపిల్‌బాషా, టి.రమాదేవి, కె.అంకరాజు, నాళం నరసమ్మ, రత్నకుమారి, పిల్లుట్ల సుధాకర్‌ తదితరులు పాల్గొన్నారు.