మా సాగుభూమిని ఇప్పించండయ్యా...!

ఓ నేత ఆక్రమించాడని ఫిర్యాదు

గురునాథం సుబ్బారావు

పొదిలి, న్యూస్‌టుడే: పొదిలిలో ఇరవై ఏళ్లుగా తాము సాగు చేసుకుంటున్న భూమిలో కొంత భాగాన్ని ఓ పార్టీ నాయకుడు, ప్రైవేటు సర్వేయరు ఆక్రమించి కంచె ఏర్పాటు చేసుకున్నారని గురునాథం సుబ్బారావు అలియాస్‌ ఘటోత్కచుడు ఆవేదన వ్యక్తం చేశారు. తాను వివిధ కేసుల్లో ముద్దాయిగా ఉండి, అప్పట్లో గుంటూరు రేంజి డీఐజీ వద్ద లొంగిపోగా, కుటుంబ పోషణ నిమిత్తం అప్పట్లో తహసీల్దార్‌ కొంత భూమి కేటాయించారన్నారు. అప్పట్లో ఏక్‌సాల్‌ పట్టాలు కూడా మంజూరు చేశారన్నారు. అప్పటి నుంచి ఆ భూమి తన స్వాధీనంలో ఉండి అనుభవిస్తున్నట్లు చెప్పారు.  ఇటీవల ఓ పార్టీ నాయకుడు, ప్రైవేటు సర్వేయరు కొంతభాగం ఆక్రమించి కంచె ఏర్పాటు చేయగా, పలుమార్లు వారిని అడిగితే ఆ భూమి తమదంటూ బెదిరిస్తున్నారని వాపోయారు. సామాజికంగా వెనుకబడిన కులానికి చెందిన తాను పెద్దలతో మాట్లాడలేకపోతున్నామని, రాజకీయ అండదండలు వారికి ఉండటం వల్ల తనకు న్యాయం జరగడం లేదని ఆరోపించారు. దీనిపై పొదిలి తహసీల్దార్‌ కార్యాలయం, పోలీసుస్టేషన్‌లో ఫిర్యాదు చేసినా తనకు న్యాయం జరగ లేదన్నారు. ఉన్నతాధికారులు స్పందించి తనకు న్యాయం చేయాలని ఆయన కోరాడు.