భార్యపై వరకట్నం, లైంగిక వేధింపులు

విజయవాడ నేరవార్తలు : భార్యను వేధించటమే కాకుండా, అసహజ లైంగిక కార్యకలాపాలు కొనసాగించాలని ఒత్తిడి తెస్తున్న భర్త, సహకరిస్తున్న వారిపై దిశ పోలీసులు  కేసు నమోదు చేశారు. విజయవాడకు చెందిన ఓ యువతి (26)కి ఒంగోలుకు చెందిన ఓ ఛార్టెర్డ్‌ అకౌంటెంట్‌తో 2021, నవంబరులో వివాహమైంది. కట్నం కింద రూ.20లక్షల నగదు, బంగారు గొలుసు, బ్రాస్‌లెట్‌, ఆడపడుచు కట్నం కింద మరో రూ.5 లక్షలు ఇచ్చారు. యువతికి 100 సవర్ల బంగారు ఆభరణాలు ఇచ్చారు. యువతి.. ఒంగోలులోని అత్తగారింటికి కాపురానికి వెళ్లింది. అదనపు కట్నం తీసుకురావాలని భర్త, అత్తమామలు, ఆడపడుచు వేధిస్తుండటంతో.. తన తల్లిదండ్రుల వద్ద వాపోయింది. ఆమెకు చెందిన మొత్తం బంగారాన్ని అత్తమామలు లాక్కుని, వారి వద్దే ఉంచుకున్నారు. ఆ తర్వాత భర్త పనిచేస్తున్న చెన్నైలో కాపురం పెట్టారు. అసహజ పద్ధతిలో కాపురం చేయాలని భర్త ఒత్తిడి చేయటంతో ఆమె నిరాకరించింది. ఈలోగా భార్యకు గర్భం రావటంతో.. బంధువులైన ఇద్దరు వైద్యుల సాయంతో అతడు అబార్షన్‌ చేయించాడు. పుట్టింటికి వెళ్లిన భార్యకు.. తరచూ నీలిచిత్రాలు పంపించి, వేధించటం మొదలుపెట్టాడు. ఈ విషయంపై పెద్ద మనుషుల్లో పెట్టినా ఉపయోగం లేకుండా పోయింది. ఈ నెల 19వ తేదీ రాత్రి నగరంలో ఉంటున్న భార్య ఇంటికి వచ్చి గొడవపడ్డాడు. కాళ్లతో తన్ని.. రూ.20లక్షలు ఇవ్వాలని, లేకపోతే పరిస్థితులు దారుణంగా ఉంటాయని బెదిరించాడు. దీనిపై బాధితురాలు దిశ పోలీసులకు ఫిర్యాదు చేశారు. పోలీసులు.. యువతి భర్త, అత్తమామలు, ఆడపడుచు, అబార్షన్‌ చేసేందుకు సాయం చేసిన ఇద్దరు వైద్యులపై 498ఎ, 406, 313, 354ఎ, 377, 506 ఐపీసీ, 3, 4 డీపీఏ, 67ఎ, 67 ఐటీఏ 2000-2008 సెక్షన్ల కింద కేసు నమోదు చేశారు.