గుర్తు తెలియని మృతదేహం స్వాధీనం

సింగరాయకొండ గ్రామీణం: మండలంలోని పాతసింగరాయకొండ గ్రామ పరిధిలోని పశువుల కుంటలో గుర్తు తెలియని వ్యక్తి(30) మృతదేహాన్ని స్వాధీనం చేసుకున్నారు. ఎస్సై ఫిరోజా ఫాతిమా తెలిపిన వివరాల మేరకు ..అయ్యప్ప నగర్‌ శ్మశానవాటిక వెనుక వైపు ఉన్న పశువుల కుంటలో మృతదేహం తేలియాడుతోందని స్థానిక పశువుల కాపరులు తెలపగా, పోలీసులు సంఘటనా స్థలానికి చేరుకున్నారు. స్థానిక యువనేస్తం సభ్యులతో మృతదేహాన్ని వెలికితీయించి పరిశీలించారు. చనిపోయిన వ్యక్తి వయస్సు ముప్ఫై సంవత్సరాలు ఉంటుందన్నారు. మృతుని శరీరంపై గోధుమ రంగు చొక్కా, నీలం రంగు ఫ్యాంటు ఉన్నాయి. కుడి చేతిపై అమ్మ, త్రిశూలం, సన్నీ, అన్నాచెల్లి అనే పచ్చబొట్లు ఉన్నాయన్నారు. శవ పంచనామా కోసం కందుకూరు ఏరియా వైద్యశాలకు తరలించి అనుమానాస్పద మృతిగా కేసు నమోదు చేసి దర్యాప్తు చేపట్టినట్లు  తెలిపారు.