విద్వేషంపై ఆందోళన

నాగులుప్పలపాడు పోలీస్‌ స్టేషన్‌ వద్ద ఆందోళన చేస్తున్న జనసేన నాయకులు

నాగులుప్పలపాడు, న్యూస్‌టుడే: అధికార పార్టీ వైకాపా ఏర్పాటు చేసిన విద్వేష ఫ్లెక్సీలను తొలగించాలంటూ జనసేన నాయకులు నాగులుప్పలపాడు పోలీస్‌ స్టేషన్‌లో ఆందోళన చేశారు. ‘పేదలకు, పెత్తందారులకు మధ్య జరిగే యుద్ధం’ పేరుతో ఎమ్మెల్యే సుధాకర్‌బాబుతో పాటు ఆ పార్టీ నాయకుల చిత్రాలతో ఉన్న ఫ్లెక్సీలను నాగులుప్పలపాడు బస్టాండ్‌ కూడలిలో గురువారం ఏర్పాటు చేశారు. ఈ విషయం తెలుసుకున్న జనసేన నాయకులు పెంట్యాల కోటి, ధనుష్‌, దానమూర్తి, చదలవాడ ఎంపీటీసీ సభ్యుడు శివకృష్ణతో పాటు పలువురు అదేరోజు రాత్రి పోలీస్‌ స్టేషన్‌ వద్దకు తరలివచ్చారు. విద్వేషాలను రెచ్చగొట్టేలా ఏర్పాటు చేసిన ఫ్లెక్సీలు తొలగించాలంటూ ఆందోళనకు దిగారు. తమ పార్టీ అధినేత పవన్‌ కల్యాణ్‌ను కించపరిచేలా ఉండటంపై అభ్యంతరం వ్యక్తం చేశారు. సంతనూతలపాడు ఎమ్మెల్యే సుధాకర్‌బాబుకు వ్యతిరేకంగా నినాదాలు చేశారు. అర్ధరాత్రి వరకు కొనసాగిన ఆందోళనతో అధికార యంత్రాంగం స్పందించింది. చివరికి బస్టాండ్‌ కూడలితో పాటు మరికొన్నిచోట్ల ఏర్పాటు చేసిన ఫ్లెక్సీలను తొలగించడంతో వివాదం సద్దుమనిగింది.