ఆ హెడ్‌కు ఇంకోటి

నర్సుతో అసభ్య ప్రవర్తన
ఎస్పీ ఆదేశాలతో కేసు నమోదు

ఒంగోలు నేరవిభాగం, న్యూస్‌టుడే: అతనో పోలీసు హెడ్‌ కానిస్టేబుల్‌. గతంలో ఓ మహిళ పట్ల అసభ్యంగా ప్రవర్తించడంతో ఉన్నతాధికారులు క్రమశిక్షణ చర్యలు తీసుకున్నారు. అయినా పంథా మార్చుకోలేదు. మరోసారి అసభ్యంగా ప్రవర్తించాడు. ఇందుకు సంబంధించిన వివరాలు ఇలా ఉన్నాయి... ఏడూరి కోటిరెడ్డి ఒంగోలు తాలూకా పోలీసు స్టేషన్‌లో హెడ్‌ కానిస్టేబుల్‌గా పనిచేస్తున్నారు. రోడ్డు ప్రమాదం కేసులో బాధితుడి వాంగ్మూలం నమోదు చేసేందుకు ఆదివారం రాత్రి సుమారు 11.30 సమయంలో ఒంగోలులోని ఓ ప్రైవేట్‌ ఆసుపత్రికి వెళ్లారు. అతను లిఫ్టు ఎక్కగా.. అప్పటికే అందులో ఒక నర్సు ఉన్నారు. లిఫ్టు తలుపులు మూసుకోగానే ఆమె చేయి పట్టుకుని అనుచితంగా ప్రవర్తించారు. హత్తుకుని ముద్దు పెట్టుకునే యత్నం చేశారు. ఈ హఠాత్పరిణామానికి బిత్తరపోయిన బాధితురాలు గట్టిగా కేకలు వేశారు. లిఫ్టు తలుపులు తెరుచుకోగానే అతని చెర నుంచి తప్పించుకుని బయటకు పరుగులు తీశారు. హెడ్‌ కానిస్టేబుల్‌ అఘాయిత్యంపై వైద్యశాల ప్రతినిధులకు ఫిర్యాదు చేశారు. ఉదంతంపై వైద్యశాల యాజమాన్యం సోమవారం ఉదయం ఎస్పీ మలికా గార్గ్‌ను కలిసి ఫిర్యాదు చేశారు. ఈ విషయాన్ని ఎస్పీ సీరియస్‌గా తీసుకుని వెంటనే చర్యలకు ఉపక్రమించారు. ఈ మేరకు బాధిత నర్సు నుంచి ఫిర్యాదు తీసుకుని హెడ్‌ కానిస్టేబుల్‌ కోటిరెడ్డిపై ఒంగోలు తాలూకా పీఎస్‌లో కేసు నమోదు చేశారు. అనంతరం ఆయన్ను అదుపులోకి తీసుకున్నట్టు సమాచారం. హెడ్‌ కానిస్టేబుల్‌ కోటిరెడ్డి గతంలో మద్దిపాడు పోలీసు స్టేషన్‌లో విధులు నిర్వహించారు. ఆ సమయంలో బందోబస్తు విధుల నిమిత్తం వెళ్లి దాహార్తి తీర్చుకునే నెపంతో ఒక మహిళ చేయి పట్టుకుని అసభ్యంగా ప్రవర్తించారు. దీంతో స్థానికులు ఆయనపై దాడి చేసి పోలీసులకు అప్పగించారు. ఈ కేసు నుంచి తనను బయట పడేసేందుకు ఆయన ఇప్పటికే కొందరు రాజకీయ నాయకులను ఆశ్రయించినట్టు తెలిసింది. ఈ తరహా వ్యవహారాల్లో తాము తలదూర్చబోమని వారు తిరస్కరించినట్టు సమాచారం.