మచిలీపట్నం-తిరుపతి ప్యాసింజర్‌ రైల్లో పొగలు

టంగుటూరు సమీపంలో ఆగిన రైలు నుంచి వస్తున్న పొగలు

టంగుటూరు, న్యూస్‌టుడే: మచిలీపట్నం-తిరుపతి ప్యాసింజర్‌ రైలులో విద్యుత్తు షార్ట్‌సర్క్యూట్‌ కారణంగా పొగలు వ్యాపించాయి. ఆదివారం అర్ధరాత్రి సమయంలో తిరుపతి నుంచి మచిలీపట్నం వెళ్తున్న ఈ రైలు టంగుటూరు సమీపంలోకి రాగానే ఓ బోగీ లోపల నుంచి పొగలు వచ్చాయి. అందులో ఉన్న ప్రయాణికులు పొగను గమనించి టంగుటూరు రైల్వే స్టేషన్‌కు చేరుకోగానే చైన్‌లాగి కిందికి దిగారు. ఈ క్రమంలో కొంత మంది రైలు నుంచి దూకి పరుగులు తీశారు. ఈ విషయాన్ని ప్రయాణికులు రైల్వే అధికారుల దృష్టికి తీసుకెళ్లగా సిబ్బంది వచ్చి పరిశీలించారు. పొగలు ఆగిపోవడంతో అధికారులు సిగ్నల్‌ ఇవ్వగా మచిలీపట్నం వైపు బయలుదేరి వెళ్లింది.