శస్త్ర చికిత్స చేస్తుండగా పసికందు మృతి

వైద్యుల నిర్లక్ష్యమే కారణమని బంధువుల ఆందోళన

వైద్యశాల వద్ద బాధితుల నిరసన

గిద్దలూరు పట్టణం, న్యూస్‌టుడే : వైద్యుల నిర్లక్ష్యం వల్లే పసికందు మృతి చెందిందని బాలింత బంధువులు ఆందోళనకు దిగారు. స్థానిక గిద్దలూరు ప్రభుత్వ వైద్యశాల వద్ద గురువారం ఈ సంఘటన చోటు చేసుకుంది. బాధితుల కథనం మేరకు వివరాలిలా ఉన్నాయి.. వైఎస్సార్‌ కడప జిల్లా కాశినాయన మండలం నరసాపురానికి చెందిన జమాల్‌ సాబ్‌ తన భార్య హసీనాను కాన్పు కోసం సోమవారం గిద్దలూరు ప్రభుత్వ వైద్యశాలలో  చేర్పించారు. హసీనా కడుపులో ఉన్న శిశువు బరువు తక్కువగా ఉండటంతో గురువారం ఉదయం గిద్దలూరు ప్రభుత్వ వైద్యశాల గైనకాలజిస్టు జమయ్మ శస్త్ర చికిత్స చేసి బయటకు తీశారు. తల్లి కడుపులో ఉన్న సమయంలో ఉమ్మ నీరు పసికందు ఊపిరితిత్తుల్లోకి చేరడంతో బయటకు తీసిన కొద్దిసేపటికే మృతి చెందిందని వైద్యశాల పర్యవేక్షకుడు డా.సూరిబాబు తెలిపారు.

పోలీసుల రంగ ప్రవేశంతో..

వైద్యాధికారుల నిర్లక్ష్యం వల్లే తాము బిడ్డను కోల్పోయామని హసీనా బంధువులు గురువారం ఆసుపత్రి ఎదుట ఆందోళన చేపట్టారు. విషయం తెలుసుకున్న సీఐ దేవప్రభాకర్‌, ఎస్‌ఐ మహేష్‌ అక్కడికి చేరుకుని బాధితురాలి బంధువులను వైద్యాధికారుల వద్దకు తీసుకెళ్లి సంప్రదింపులు జరిపారు. శిశువు బరువు తక్కువగా ఉండటం.. ఉమ్మ నీరు ఊపిరితిత్తుల్లోకి పోవడం వల్లే పరిస్థితి విషమించి మృతి చెందిందని వైద్య నిపుణులు చెప్పడంతో వారు ఆందోళన విరమించారు.